Во домот на Ангела во Скопје: Светли бои и винтиџ бебешко креветче кое го користел и нејзиниот сопруг

Детали

сабота, 19 октомври 2024

„Детската соба за ќерката ја уредувавме сами, во време на короната - еден ден ми текна дека сакам да е во виолетова боја и сама ги кречев ѕидовите во 9-тиот месец од бременоста“, вели Ангела од Скопје за уредувањето на семејниот дом.

Ангела Костовска, по професија економист, живее во Скопје, во стан од 64м2. Во семејниот дом, во кој доминираат детали во бела, зелена и крем нијанса, живеат и сопругот и нивните две деца.

Стилот е едноставен, со чисти линии и внимателно избрани детали.

Сепак, Ангела вели дека омилена ѝ е детската соба, која самата ја бојадисувала кога била во 9-тиот месец од бременоста, а таму е сместено и детското креветче кое своевремено било на нејзиниот сопруг, а сега во него спие нејзиното синче.

За уредувањето на домот, Ангела раскажа за CRNOBELO.com:

Во овој дом се вселивме непосредно пред раѓањето на нашето прво детенце и тука живееме скоро три години.

Со сопругот имаме сличен стил и сакаме едноставност, практичност, светлина и свежина во домот.

Уредувањето на просторот го правевме сами.

Бидејќи знаевме дека во овој дом ќе растеме мали дечиња некое време, од почеток размислувавме просторот да е прилагоден за деца.

Биравме материјали кои лесно се чистат, не се оштетуваат и да се со заоблени рабови.

Ова ни беа главни критериуми при уредувањето, па во нашиот дом софата ја биравме да биде pet friendly што е еквивалент за лесно отстранување флеки и за мали дечиња.

Комодата, клуб масата, трпезаријата, наткасните и бирото на сопругот - сите се со заоблени рабови.

Исто така, за полесно одржување под мебелот, гледавме да има висина за да може роботот правосмукалка лесно да поминува.

Бидејќи најголем дел од денот сме во дневната соба и тука играат децата, просторот е прилагоден за нив и имаат и катчиња за нивните активности.

Се трудиме да имаме што помалку непотребни играчки и внимателно бираме дрвени играчки кои се едукативни и ќе траат.

А јас се трудам да имаат и двајцата соодветни развојни активности и „направи сам“ игри со рециклирање и употреба на материјали кои веќе ги имаме низ домот.

Ова навистина функционира кај нас да нема преголем неред од играчки.

Во домот доминира белата боја, со зелени, крем и црни детали.

Кујната иако е бела, лесно се одржува. За нас зелената боја во комбинација со белото е асоцијација на свежина.

Продолжува на следната страница...