Совети за чистење од луѓето чиј дом е секогаш среден

Секако дека никој не е среќен кога мора да чисти и да изгуби цел ден во средување на домот.

Но, оваа непријатна обврска може да се претвори во корисна навика која нема никогаш да ви претставува проблем.

Наместо да поминете цел ден во чистење, и на крај пак да не биде целосно средено, обидете се да практикувате трикови кои ќе ви го олеснат животот.

За сите љубители на чисто, совети од оние чиј дом е секогаш среден:

Користете ја машината за садови целосно

Не секој знае и го практикува ова, но во машината за садови може да миете и други работи. Плафоњерки, чешли, решетки од вентилација, кулинарски четки, четки за шминка, решетка од шпорет или фрижидер, метални и пластични играчки, па дури и вештачко цвеќе.

Венецијанери

Ако сакате брзо да ги исчистите венецијанерите од прашина, користете чорап како на фотографијата. Ставете ја раката во него и чистете ги лентите од двете страни одеднаш. Овој трик можеби ви е познат, но време е да почнете и да го практикувате.

Полици од фрижидер

Покријте ги полиците со украсна фолија или хартија како на сликата. Така ќе ви биде многу полесно да исчистите дококлу нешто се истури или едноставно ќе ја замените хартијата.

Ролер за облека

Ролерите за облека не се само за таа намена – со нив можете да ги чистите и ламбите, мебелот и полиците.

Држач за ножеви

Оние кои во домот имаат посебен држач каде ги ставаат ножевите, често забораваат дека таму се собира многу прашина и нечистотија која тешко може да се исчисти. Обидете се да го исчистите држачот така што ќе дувате со фен, а тој сам ќе си ја заврши работата.

Завеси за бања

Доколку не сакате да се појави мувла на нив, перете ги заедно со неколку пешкири во машина за перење и закачете ги да се исушат.

Чистење на мали места

Понекогаш, дури и најмалата цевка од правосмукалката е преголема за некои делови од домот, како на пример шините од плакарот. Доколку сакате да ги исчистите, ставете картон од тоалет хартија на правосмукалката и свиткајте ја колку што е потребно за да влезе во тенкиот простор.

Клима за чистење прашина

Пред да почнете да чистите прашина, пуштете ја климата за филтрите да ја соберат прашината која се крева во воздухот. Потоа чистењето и бришењето ќе оди многу полесно.

Корпи во кујната

Шеќерот, кафето, чајот, солта и останатите слични производи кои секојдневно ги користиме, најдобро е да се чуваат во една корпа која ќе стои на работната маса. Така, ако нешто падне, нема да се истури врз масата, па да продолжи на земја и да создаде неред, туку во корпата која може да ја истресете и вратите.

Садови за миленичиња

Кога миленичињата јадат, тие најчесто знаат да остават неред и да ги поместат садовите насекаде низ кујната. За да не се случува ова, залепете ги садовите за подот и тие ќе јадат само таму без да може да ја истурат храната по цел дом.

Цитрон со сол

Исечете цитрон на половина и одозгора посипете крупна сол – одличен трик за чистење на мијалникот.

М. М. | Црнобело