Што треба да знаете за шампонот за суво миење и како правилно да го користите?

„Сувиот“ шампон не ја мие косата, туку ги апсорбира нечистотиите и прави таа да изгледа почисто. Затоа, иако во некои ситуации е корисен, не може да биде замена за вообичаено миење на косата со обичен шампон.

Шампоните за суво миење можат да бидат вистински спас кога немате време за бањање, а имате некоја неодложна обврска.

Иако тие навистина се генијален изум, сепак не треба да претерувате со нивната употреба.

Што треба да знаете за овие продукти и како правилно да ги користите?

И покрај името, сепак не е шампон

Иако овој продукт е познат како шампон за суво миење, тој воопшто не ја мие косата.

Наместо тоа, „сувиот“ шампон ги апсорбира нечистотиите и мастите од скалпот, па прави косата да изгледа почисто.

Не може да го замени миењето на косата со обичен шампон

Како што веќе кажавме, овие продукти само ги впиваат нечистотиите и не ги чистат косата и скалпот.

Затоа, не можат да бидат замена за вообичаеното миење.

Што содржи шампонот за суво миење?

За разлика од вообичаените шампони кои содржат вода и состојки за миење кои ги отстрануваат нечистотиите, „сувите“ шампони најчесто содржат алкохол, скроб или вид глина.

Овие состојки ги впиваат нечистотиите од скалпот, но не ги отстрануваат.

Секако, овие продукти имаат и мириси што им даваат пријатна арома.

Важно е да го користите според типот на вашата коса

Секој тип на коса си бара различни продукти и различна нега, а ова важи и за шампоните за суво миење.

Ако имате коса која брзо се мрси, можете да го нанесете сувиот шампон и веднаш по миење кога времето е многу топло и потењето е почесто.

Ако имате сува коса, препорачливо е да го користите овој продукт само кога е навистина неопходно за да не ја исушите косата дополнително.

Ако имате виткана коса, прво исчешлајте ја косата, па потоа нанесете го шампонот.

Не треба да претерате со неговата употреба

Избегнувајте да ги користите овие шампони секојдневно и никако немојте да ги користите како замена за обичен шампон.

Бидејќи продуктот останува на вашиот скалп, ако го ставате секојдневно, може да ги затне фоликулите и да настане иритација.

Најдобро е да ставате шампон за суво миење не повеќе од 2-3 пати неделно и секогаш правете пауза од барем еден ден помеѓу две употреби.

Како да го нанесете правилно?

Ако имате нормална или сува коса, користете шампон за суво миење само кога ќе забележите дека косата ви изгледа мрсна. Притоа, немојте да го нанесувате по целата должина, туку само на корените.

Нанесувајте го шампонот на растојание од 15-тина сантиметри, а потоа измасирајте го скалпот со прстите.

Оставете го да делува неколку минути, па ако има вишок што се познава, можете да го „издувате“ со фен за коса.

Препорачливо е и да го нансувате навечер, пред спиење – на овој начин ќе има повеќе време за делување.

Користете го поретко ако имате проблеми со првут

Нема доказ дека шампонот за суво миење предизвикува првут. Но, ако веќе имате проблеми со првут, препорачливо е бидете умерени со користењето на овој продукт.

Нечистотиите и мастите се една од причините за појава на првут, а бидејќи тие остануваат на скалпот кога користите сув шампон, претераното користење може да ја влоши состојбата.

Спирова С. | Црнобело