5 модели на чанти кои ќе ја обележат пролетта 2017

Во текот на пролетта, најважната споредна работа во женската гардероба ќе се носи во рака или на страна, ќе биде со нежни бои или впечатлив дезен, а ќе ја красат ланци, реси и поп-арт илустрации.

Пролетта е на прагот, а со неа и потребата од нови парчиња облека и детали со кои ќе го освежите изгледот. Доколку сè уште не сте одлучиле која чанта ќе биде вашиот главен адут за претстојната сезона, ви откриваме кои се петте модели за кои модните критичари се согласни дека ќе бидат вистински хит наредните месеци.

Шик, впечатливи или практични – изборот е на вас:

1. Питон

Кожата од питон е материјалот кој никогаш не излегува од мода, особено кога се чантите и чевлите во прашање. Подеднакво добро функционира и за дневни и вечерни варијанти, инстантно додавајќи ѝ доза на елеганција на секоја модна комбинација. За сите оние кои не се љубителки на „природните“ материјали, одлична алтернатива се чантите од вештачка кожа, кои се толку добро изработени што разликата воопшто не е забележлива.

Розовите, тиркизните и пурпурните змии не постојат во природата, но затоа ги има во дизајнерските мечти и имагинација.

2. Ранци

Практични и чувари на грбот, а од неодамна и многу модерно и убаво стилизирани, ранците во сите бои, големини и облици се масовен тренд оваа пролет.

Од спортските ранци е оставен само кројот, а сè останато, како материјалите, боите и деталите, доби мошне елегантна и женствена нота.

3. Седло-чанта

Чантата која се носи преку рамениците е најдобриот пријател на секоја жена, а оваа сезона вистински хит се оние во облик на седло.

За елеганцијата на овој модел заслужни се заоблената форма, префинетите детали и земјените нијанси.

4. Чанти со апликации

Откачените чантички веќе не се резервирани само за помладите девојки. По необичните модели со монисти, ликови од цртаните филмови и колоритни апликации сега воздивнуваат и жените. Најдобро ќе изгледаат во пар со едноставна комбинација на облека, истакнувајќи се меѓусебно, а вие сигурно нема да останете незабележани.

Украсени со светкави везови, колажни илустрации, 3D цветови и ланци, ваквите креации се карта за влез во центарот на вниманието.  

5. Чанти со кратка рачка

Кога се чантите во прашање, нема ништо поженствено од моделот со кратка рачка. Оваа сезона, популарни ќе бидат оние со поголеми димензии, во кои ќе можете да ставите сè што ви треба, а и понатаму ќе изгледате како дама.

Бидејќи станува збор за помасивни модели, наместо на подлактицата, ќе се носат во рака, потпирајќи се на колкот.  

М. А. | Црнобело