Исповед на жена: „30 години бев во брак со зависник од секс – животот ми беше пекол“

Во периодот кога најмалото дете почнало да оди во градинка, Мери веќе била во 30-тите години и тогаш одлучила да побара помош од психијатар.

„Одговорот на психијатарот дека јас постојано сум силувана и убедувана за секс направи да се чувствувам ужасно. Како може некој што толку многу го сакам и којшто треба да ме сака, да ми направи такво нешто?“ – вели таа.

Со оглед на тоа што и самата потекнувала од семејство на разведени родители, Мери вели дека не сакала нејзините деца да живеат сличен живот, па одлучила да му прости.

Кога одлучила да разговара со пријателките и им се доверила дека нејзиниот сопруг постојано сака секс, нивниот коментар бил дека тоа е супер и дека и тие посакуваат да имаат такви сопрузи.

Мери вели дека почнала намерно да се запуштува и да не внимава на својот изглед, со надеж дека ќе му стане одбивна и ќе ја остави на мир, но ниту тоа не помогнало.

„Неговата потреба за секс беше непроменета, дури и кога влезе во доцните 50-ти години од животот. Во 2019-та година имав нервен слом заради проблеми со здравјето и бев на боледување шест месеци.

Тој беше загрижен и сочувствуваше со мене, но на крај пак се обиде да ме убеди да имаме секс за да ми биде подобро.

Сакав да врескам, но не собрав сили за да му кажам колку сум уморна од него. Колку ми е уморно телото. Дека сѐ ме боли и одвнатре и однадвор“ – вели таа.

Мери, дури тогаш почнала да забележува дека сопругот Мајкл, освен што постојано ја прогонува неа за секс, истовремено следел уште 1.000 други жени на социјалните медиуми, за кои се сомнева дека му служеле за да си ги задоволи потребите.

По речиси 30 години поминати заедно, Мери собрала сили да му се спротивстави на сопругот и заедно тргнале на брачно советување.

Кога терапевтот му рекол дека е зависник од секс, тој молчел за време на сесијата, но потоа ѝ рекол дека е сосема нормален и дека „сексот е сосема нормална човечка потреба“.

Кога видела дека работите не се подобруваат, Мери одлучила да побара развод. Со оглед на тоа што две од трите деца веќе биле полнолетни, таа седнала и им раскажала за сѐ што се случувало.

„Беше чудно, но не сакав моите ќерки да бидат третирани така или синот да мисли дека тоа што татко му го прави е во ред“ – раскажува Мери.

Но, разводот бил само почетен чекор за оваа жена да може да си го подобри здравјето. Потоа следувале над 100 сесии со психолог, терапии со хипноза за да го победи стравот од заспивање.

„Најљубезните зборови што ги слушнав од една од моите терапевти е дека јас не сум виновна и дека не сум лоша сопруга – како што си мислев целиот свој живот.

Ми објасни дека кога си во врска со зависник од секс, што и да направиш нема да биде доволно“ – вели таа.

Сега, по толку години Мери вели дека конечно чувствува дека си го вратила сопственото тело, а својата приказна ја споделува со цел да им укаже на жените и девојките да внимаваат и дека животот со зависници од секс воопшто не е лесен, туку може да се претвори во пекол.

Б. С. Б. | Црнобело / фото: depositphotos.com