Како луѓето кои не можете да ги поднесете можат да влијаат позитивно врз вас?

Не може сите луѓе на светот да ви се допаѓаат и обгратно, а со ова мора да се помирите еднаш-засекогаш.

Навистина, никој не очекува да имате добро мислење за сите колеги на работа или за пријателите на вашите пријатели, ниту пак за сите роднини.

Но, не треба овие луѓе да ги блокирате целосно бидејќи колку и да ви се чини неверојатно, од нив можете да имате позитивна корист.

Како е можно тоа?

Оние кои не ви се допаѓаат ви даваат различни перспективи

Не мора да ја сакате оваа личност, но следете што прави, како се снаоѓа и учете од неа. Со тек на време може да развиете посилна емпатија и толеранција, како и подобро разбирање на различностите.

Верувајте, понекогаш туѓото мислење, дури и ако доаѓа од личност што не можете да ја поднесете, може драстично да ви ги промени видиците.

Ве учат да бидете поупорни

Со оние кои сте блиски сте и попопустливи и поспремни сте да направите компромис во нивна корист. Меѓутоа, со другите, ви треба повеќе енергија и поцврст став за да го „истерате“ своето. А тоа воопшто не е лошо.

Нивните критики интерпретирајте ги конструктивно

Доколку недопаѓањето е обострано, може да се случи од нив да чуете брутално искрено мислење кое колку и да ве повреди во прв момент, понатаму ќе ви биде мотив за да бидете подобри.

Размислете само, блиските полесно би ве излажале, наместо да ве повредат со искреноста (и секако, не треба да им се лутите поради тоа), но подалечните се на некој начин пообјективни.

Ако постои вистина во нивните забелешки и критики, не размислувајте премногу и почнете да се менувате на подобро.

Е. Д. | Црнобело