Совети за патувањето со миленикот да ви помине без проблеми и тешкотии

Патувањето со милениче денес е навистина полесно, но сепак постојат одредени предизвици. Важно е да имате предвид дека патувањето може да биде стресно за миленичето, па потребно е да му го направите целото искуство што е можно поудобно. 

Во продолжение погледнете кои се нештата што треба да ги направите пред и за време на патување со милениче.

Миленичето мора да има чип

Веројатно досега вашето милениче е чипувано, но сепак проверете дали неговиот микрочип е прифатен во земјата во којашто ќе одите.

Пасош, вакцини и други документи

Како и за луѓето, пасошите се неопходни и за миленичињата. Пасошот можете да го добиете од вашиот ветеринар кога ќе му ја ставите првата вакцина на миленичето.

Тогаш ќе го вградат и неговиот микрочип. Во пасошот се наоѓаат податоци за вас, сопственикот, како и за миленичето, бројот на неговиот чип и датумот на вакцинација.

Покрај тоа, ветеринарот треба да ви издаде и сертификат дека вашето куче не е болно.

Од голема важност е и распоредот на вакцините. На пример, за патување во Австралија и Велика Британија, миленичето мора да биде вакцинирано најрано 180 дена пред патувањето.

Бидејќи секоја држава има разни правила за разни животни, добро истражете кога и кои вакцини треба да ги прими миленичето.

Патување со автомобил

Патувањето со автомобил е најудобната опција за миленикот, но и во овој случај треба да направите неколку подготовки. Уште пред да тргнете, испланирајте кога ќе правите паузи.

Потоа, на ланчето на вашето милениче добро е да се наоѓаат вашите податоци, вашата адреса, како и адресата на местото каде што ќе отседнувате, во случај миленичето да се изгуби. Доколку миленичето е чипувано, проверете дали треба да ги промените податоците на чипот.

По патот, на вашето милениче ќе му биде потребна храна, вода, но и неговата омилена играчка. Важно е да обрнете внимание и на безбедноста – последното нешто што ви треба е миленичето да почне да се движи низ автомобилот и да го попречува возењето. Најбезбедната опција е да го сместите миленичето во удобен транспортер.

Најдобро е да правите пауза на секои неколку часа, во зависност од потребите на вашето милениче. Доколку излегувате од автомобилот, немојте да го оставате миленичето само внатре.

Дури и ако температурата не е превисока, внатрешноста на автомобилот може да се загрее и да му наштети на миленичето.

За да немате проблеми со неговото однесување, добро е однапред да го навикнете на патување. Вежбајте влегување и излегување од кафезот за транспорт, и после секоја успешна вежба, надградете го.

Добро би било да го наградувате и за време на патувањето за да го сфати како пријатно искуство.

Патување со авион

Денес патувањето со милениче во авион не е проблем, но најдобро е да се распрашате за сите правила и услови. Контактирајте ја авиокомпанијата и прашајте каде ќе го сместат вашето милениче и кој ќе биде одговорен за неговата безбедност.

Неретко се случува миленичињата да се изгубат или повредат при летање со авион, особено ако не се сместени во кабината со вас. Некогаш милениците се сместени во посебна кабина за животни, каде што притисокот и температура не се исти. Ова може да биде проблематично за одредени раси кучиња кои се почувствителни.

Во зависност од расата и големината на миленичето, некои авиокомпании дозволуваат да го понесете во кабината со вас, па распрашајте се и за тоа.

За да го направите патувањето што е можно поудобно за миленичето, прашајте го вашиот ветеринар за некои лекови за смирување и гадење.

Патување со воз и брод

Пред да купите билет за воз или брод, прашајте дали е дозволено патување со миленици. Доколку е, распрашајте се која опрема ќе ви биде потребна и каде ќе биде сместено миленичето. Како и кај другите видови транспорт, и во овој случај треба да понесете сè што му е потребно на миленичето.

Сместување и отседнување со милениче

Пред да закажете сместување, прашајте дали е дозволено да отседнувате со милениче, како и кои се правилата за тоа. Понекогаш некои хотели или апартмани прифаќаат миленици, но само до одредена големина.

Исто така имајте на ум дека понекогаш оваа услуга се наплаќа дополнително, па прашајте и за тоа. Пред да закажете, прашајте која опрема ќе ви биде достапна во собата или апартманот, за да знаете што треба да понесете.

Спирова С. | Црнобело