Едноставни (и реалистични) цели кои можете да ги реализирате до крајот на 2022 година

Не ја чекајте новата година за да почнете да се храните здраво или да вежбате - почнете уште сега и до крајот на декември ќе имате воспоставено цела рутина што лесно ќе ја продолжите во 2023-та. 

Ако сте како повеќето, сигурно сте ја почнале 2022 година со цела листа цели.

Веројатно и сте почнале да работите на некои од нив, но за месец-два сте кренале раце од повеќето. Сега, пак, можеби подготвувате нова листа со цели за 2023 година.

Но, пред да почнете да размислувате за следната година, не заборавајте дека уште има време да го извлечете најдобро од тековната.

Уште има време да се посветите на некои помали (и пореалистични) цели пред крајот на овој декември.

Седум едноставни и реалистични цели кои имате време да ги реализирате до крајот на годината:

Почнете да се грижите за здравјето

Не ја чекајте новата година за да почнете да се храните здраво и да бидете физички поактивни.

Дотогаш има скоро три месеци, а ова е доволно време да воспоставите рутина.

Уште сега почнете да се храните поздраво, почнете да вежбате и ќе ја дочекате новата година пофит и поздрави.

Средете ги финансиите и почнете да штедите

Факт е дека во периодот околу Нова година сите трошиме многу повеќе пари и од обично, и од планираното.

Па, почнете уште сега да тргате по некој денар настрана и навреме подгответе се за големите трошоци што следуваат.

За да не си го оштетите буџетот, пробајте и да престанете да трошите на неважни работи и воспоставете поголема контрола.

Средете си го гардероберот

Облеката што не сте ја облекле повеќе од две сезони и облеката што дури сте заборавиле дека ја имате, само ви зафаќа простор.

Па, соберете ја и донирајте ја или подарете ја некому.

Ослободете се од токсичните „пријатели“

Ќе си направите огромна услуга ако од вашиот живот ги отстраните луѓето кои ве омаловажуваат, ве критикуваат и, генерално, само ви штетат.

Личноста што не ве почитува не го заслужува ни вашето време, ни вашето внимание.

Опкружете се со луѓето кои вистински ве сакаат и ценат, а во новата година држете се настрана од сите кои ви штетат.

Направете нешто за вашите сакани

Не ја чекајте празничната сезона за да ги израдувате вашите сакани.

Нема потреба да трошите богатство – дури и најмалиот гест, и најмалиот подарок ќе им покаже дека сте помислиле на нив и ќе им го разубави денот.

Прочитајте две-три книги

Многу луѓе си поставуваат цел во новата година да читаат повеќе. Неретко си замислуваат и нереална бројка која е практично невозможно да се достигне кога ќе се земат предвид секојдневните обврски.

Ако и вие си поставивте ваква и цел и не ја исполнивте, до крајот на годината сепак имате време да прочитате барем две книги.

Поставете си нови цели

И, на крај, направете си листа со цели за новата 2023 година.

Но, овојпат пробајте да бидете реалистични.

Спирова С. | Црнобело