Часови по среќа, елфски јазик – Необични предмети во училиштата и факултетите ширум светот

Учениците во Јапонија имаат предмет кој се фокусира на природата. Со овој предмет тие учат како да се поврзат со неа и како да ја ценат повеќе.

Предметите што се изучуваат во основно се колку-толку исти во целиот свет – мајчин јазик, математика, природни науки…

Во средните училишта постојат разлики во зависност од тоа дали станува збор за стручно училиште или не, а постојат и различни изборни предмети. Факултетите, пак, имаат задолжителни предмети во зависност од струката, а секако има и изборни.

Факт е дека постојат разлики во наставните програми на образовните установи ширум светот, но некои навистина се истакнуваат со уникатните предмети кои не би ги нашле на друго место.

Дел од овие предмети се предавале само извесен период, но некои од нив си останале во наставната програма. 

Неколку вакви предмети во продолжение:

Елфски јазик на Универзитетот во Висконсин

Џ. Р. Р. Толкин измислил неколку јазици (со свои граматички правила и правопис) за неговата трилогија „Господарот на прстените“. Од овие јазици, најпопуларен е „елфскиот“ кој можете да го слушнете во екранизацијата на книгите.

На Универзитетот во Висконсин има предмет посветен на овој јазик, а професорот што го предава е еден од лингвистите кои работеле на филмовите.

Предмет за Лејди Гага на Универзитетот во Јужна Каролина

Професор од Универзитетот во Јужна Каролина стана хит откако направи невообичаени промени во неговиот предмет „социологија на славата“.

Најпрво тој сакал да ја искористи Лејди Гага како пример во неговиот предмет, но бидејќи бил нејзин огромен фан, решил целиот материјал да го посвети на неа.

Па, на овој предмет се изучува животното дело на Лејди Гага, како и нејзиниот подем во музичката кариера.

Предмет посветен на Хари Потер на Универзитетот во Охајо

На Универзитетот во Охајо има предмет за литературниот жанр фантазија кој се фокусира само на серијалот Хари Потер.

Овде студентите ги изучуваат разните техники на пишување што ги користела Џ. К. Роулинг, како и влијанието на серијалот врз популарната култура.

Часови по среќа во Германија

Неколку училишта во Германија имаат предмет со чија помош учениците учат како да бидат посреќни и подобри личности.

На крајот од годината учениците се вклучуваат и во добротворна работа.

Историјата на Битлси на Универзитетот во Ливерпул

Студентите на Универзитетот во Ливерпул можат да слушаат предмет посветен на историјата и делото на култниот бенд Битлси.

Бендот потекнува од овој град, па веројатно од универзитетот сакале да им оддадат почит.

Предмет за поврзување со природата во Јапонија

Учениците во Јапонија имаат предмет каде што учат да се поврзат со природата, и со тоа да ја ценат повеќе.

Вампирите во литературата на Универзитетот во Висконсин

Бидејќи филмовите и книгите со вампири се многу популарни, на Универзитетот во Висконсин има предмет кој се фокусира на овие суштества во литературата, но и во филмската уметност.

Во предметот се изучуваат и старите легенди и митови поврзани со вампирите.

Спирова С. | Црнобело