6 причини зошто некои луѓе постојано се извинуваат (+ 5 ситуции кога навистина нема потреба од тоа)

Луѓето кои постојано се извинуваат обично имаат проблеми со ниска самодоверба, но некогаш причината за ова може да биде и манипулирање на другите.

Од најрана возраст нè учат да се извиниме кога ќе направиме грешка и иако со ова се покажува учтивост и почит, постојаното извинување е далеку од добро.

Кои се најчестите причини за постојаното извинување?

Ниска самодоверба

Извинувањето е учтиво, но извинувањето во ситуации кога воопшто нема потреба за тоа може да биде знак за ниска самодоверба.

Обично луѓето со ниска самодоверба се плашат дека ќе предизвикаат негативна реакција кај другите, па неретко се извинуваат „превентивно“.

На пример, кога сакаат да прашаат нешто, тие го почнуваат разговорот со „Се извинувам“ или нешто во сличен контекст, наместо да речат само „Може ли да прашам нешто?“

Манипулација

Во овој случај, извинувањето е чиста лага и луѓето го користат за да ги манипулираат другите со цел да го добијат она што го сакаат.

Обично ова извинување е проследено со „Но…“ – „Се извинувам што лажев, но мислев дека ќе се налутиш“ или „Се извинувам што ти се развикав, но ти ме испровоцира“.

Нормално, не значи дека секоја личност што ќе се извини во овој контекст сака да ве манипулира, но ако ова се случува често, можеби треба да бидете повнимателни.

Перфекционизам

Ова се луѓе кои си поставуваат превисоки, нереални стандарди кои е практично невозможно да ги исполнат. Тие сакаат и сè околу нив да се одвива беспрекорно, а кога ништо од ова не оди по план и кога нештата не се совршени, чувствуваат потреба да се извинат, наместо да го прифатат фактот дека некогаш се случуваат и такви работи.

Неспособност за контролирање на гневот

Во овој случај проблемот не е постојаното извинување, туку гневот и неможноста личноста да го контролира.

Со други зборови, овие луѓе дозволуваат гневот да ги надвладее, поради што често ги повредуваат и навредуваат нивните сакани, па на крај се извинуваат и се однесуваат како да не се случило ништо.

Страв од конфликт

Слично како кај луѓето со ниска самодоверба, некои лица, едноставно, се плашат од конфликти и ги избегнуваат по секоја цена и скоро никогаш не истапуваат за себе.

А, еден начин да избегнат конфликт е постојано да се извинуваат, дури и ако вината е на некој друг.

Токсична врска со родител, партнер, пријател…

Ако станува збор за токсична врска со некоја личност, „жртвите“ во ваквите ситуации неретко чувствуваат вина и самите се обвинуваат за лошото однесување на партнерот, родителот или пријателот.

Поради тоа, постојано чувствуваат потреба да се извинат, без разлика дали навистина има потреба од тоа.

За што не треба да се извинувате?

1. За работите што се надвор од ваша контрола.

2. Ако не можете веднаш да направите нешто за некој друг.

3. Ако ви треба помош или сакате да прашате нешто.

4. За работи што не се ваша вина.

5. Ако не сакате да направите нешто бидејќи е спротивно од вашите верувања и слично.

Спирова С. | Црнобело