Што значи кога сонувате цело време ист сон и како да престане да ве „демне“?

Многумина тврдат дека им се случува постојано да сонуваат еден ист сон или, пак, некои соништа да им се повторуваат. Постои ли објаснување за овој феномен и што сака вашиот сон да ви каже?

Според науката, повторливите сонови може да се одраз на некои неразрешени прашања во вашиот живот, но можат да бидат предизвикани и од некоја физиолошка појава.

Иако не мора да значи дека секогаш станува збор за страшни соништа и кошмари, сепак многумина се исплашени и вознемирени од тоа што постојано го сонуваат истиот сон. Се прашуваме - што може тоа да значи и како да го протолкуваме?

Соништа дека летаме или паѓаме, дека некој не прогонува или нè напаѓа. Потоа, соништа со разголеност, враќање во училиште, губење заб, доцнење на некој важен настан, автомобилска несреќа... Ова се само некои од соништата што се повторуваат кај поголем дел од нас.

Иако соништата можеби не се идентични, сепак овие симболи како постојано да се повторуваат, одново и одново.

Прочитајте и Пари, неверство, оган и уште седум други соништа што не треба да ги занемарувате - Што сака да ви каже потсвеста?

Според Healthline, повторувањето на соништата се должи на три главни проблеми, а тоа се некои неостварени желби, работи за кои сте загрижени или сте под стрес, или работи од минатото со коишто сè уште не сте се справиле.

Честопати се случува да се разбудиме возбудени и преплашени првиот пат кога сме сонувале некој сон, но што да се прави кога тој ист сон повеќепати се повторува? Дали има решение?

Во овој случај, иако не постои реално решение што би можело да влијае врз тоа што го сонувате, разговорот со психолог или психијатар за нештата за коишто сте загрижени или сте под стрес, можеби ќе ви помогне и ќе ги промени соништата што се повторуваат. 

Иако многу често соништата можат да ви се чинат налудничави и несфатливи, сепак јасно е дека тие даваат увид во тоа со какви емоции се соочувате и кои се вашите желби.

Доколку и вие имате некој сон што постојано ви се повторува и сакате да го протолкувате, можете да го пребарате во нашиот соновник.

Б. С. Б. | Црнобело / фото: pixabay.com