Фото докази дека велосипедот станува превозно средство број 1 – кај нас и во Европа

Во Скопје многу почесто гледаме луѓе на велосипед, кралицата Максима ги врши работните обврски со велосипед, а во Ирска се одржуваат и прес-конференции на велосипед – како се менува културата за возење велосипед?

Во многу европски земји не беше потребна пандемија за да се случи ова и луѓето години наназад го користат велосипедот како главно превозно средство, а велосипедската инфраструктура е на завидно ниво.

Сепак, во некои земји, како на пример кај нас, иако и во последниве неколку години луѓето почнаа почесто да се возат велосипеди и да се прават патеки, сега желбата за заштита од вирусот придонесе уште повеќе да се зголеми бројот на велосипедисти низ земјата.

На Фејсбук страната на „НаТочак“, може да се забележи дека во време на корона активно се вози велосипед во Скопје, а замислете кога би имало и уште подобри услови за тоа, колку повеќе луѓе би го избрале овој начин на транспорт.

Низ градот, голем дел од главните улици се „покриени“ со велосипедска патека, но би било одлично кога насекаде би постоела широка велосипедска патека, како онаа која деновиве е забележана во Измир.

Имено, одземена е цела автомобилска лента за да може да се добијат 2 велосипедски ленти во различен правец, а од страната има простор и за заштитни столбови помеѓу автомобилската и велосипедската патека.

Во многу европски градови, иако има добра велосипедска мрежа, се прават промени и патеките се прошируваат, со цел да се создаде поголем простор за безбедност на велосипедистите и можност за дистанца при возење.

Велосипедот како средство за транспорт во многу европски земји е на прво место, а во Холандија не само „обичните граѓани“, туку и кралицата Максима вози велосипед кога ги врши своите должности, дотерана од глава до пети.

Во Ирска пак, лидерот на Зелената партија, одржува прес-конференција со новинари на велосипеди.

Животот навистина може да стане поубав ако сите почесто го бираат велосипедот како превозно средство, а оние кои најчесто работните обврски ги завршуваат со автомобил, барем да користат велосипеди за слободните и рекреативни активности.

М. М. | Црнобело