Кога е време да ги делите финансиите со партнерот и дали тоа е добро?

Доколку живеете со вашиот партнер, дури и ако не сте во брак, сигурно сте размислувале за тоа дали да ги делите финансиите. Но дали е добро да имате заедничка сметка и заеднички картички? Како и секогаш, и во овој случај постојат неколку предности и недостатоци.

Предности од делењето на финансиите

Заеднички цели: Доколку имате заеднички цели поврзани со парите, како отплаќање на долговите за 10 години, заедничка заштеда и слично, тогаш би било добро да ги делите вашите приходи. Заедно полесно ќе ги исплатите долговите и побрзо ќе заштедите повеќе пари.

Должење: Доколку не ги спојувате вашите плати, ќе почнат да се појавуваат проблеми за тоа кој кого должи и колку. Следењето на трошоците станува многу полесно кога средствата на располагање се заеднички.

Посилна врска: Кога ќе ги делите парите со партнерот, повеќе нема да размислувате што е ваше, а што негово. Ова значи дека сакате да работите како тим, а со самото тоа врската ќе стане посилна.

Давање и земање: Понекогаш вие ќе имате повисоки приходи, понекогаш вашиот партнер. Но кога целиот приход ќе биде заеднички, нема да се натпреварувате еден со друг.

Семејство: Ќе биде речиси невозможно да одредувате од чии пари ќе трошите за детето. Нормално дека и двајцата ќе сакате да му го овозможите најдоброто на вашето малечко, а здружувањето на платите ќе го направи тоа многу полесно.

Ќе ја отстраните нееднаквостa: Врската би била многу тешка доколку едниот партнер може слободно да отиде на патување, додека другиот едвај го преживува месецот. Бидејќи сте се одлучиле на заеднички живот, ќе треба заедно да ги поднесувате вашите финансиски проблеми, без разлика кој партнер е во потешка ситуација.

Недостатоци од делењето на финансиите

Губење на индивидуалното донесување одлуки: Кога ги делите парите, ќе треба да разговарате со партнерот за што и да сакате да купите. Можеби вам нема да ви се даваат илјадници евра за автомобил, а на партнерот да не му се даваат пари за вашата нова облека. Секогаш ќе треба да барате компромис.

Важни прашања: Кога ќе одлучите да ги делите парите, треба да разговарате и за она што се случувало пред да почнете да живеете заедно. Дали вашата заштеда од порано сега ќе ја делите и со партнерот? Дали вашите долгови од минатото ќе бидат само ваши, или повторно ќе ги делите со партнерот? Истото важи и обратно.

Стратегии за инвестирање: Можеби партнерот сака да инвестира во едно нешто, но вие во друго. Кога ќе ги делите финансиите, ќе треба да најдете средина што ви одговара и на двајцата.

Дали сте подготвени да ги делите парите со партнерот?

Доколку сте ги разгледале сите предности и недостатоци и сте одлучиле дека сакате да ги делите финансиите, добро е да размислите и дали сте навистина подготвени за тоа. Важно е да знаете дека ова е голем чекор напред во вашата врска и сигурно ќе сакате да ги избегнете несаканите последици. Па како да дознаете дали сте подготвени?

Веќе сте разговарале за вашата иднина: Најпрво важно е да разговарате што двајцата сакате од иднината. Во што сакате да инвестирате, колку сакате да штедите и слично се нешта што мора да се дискутираат. Имено, паровите најчесто раскинуваат поради пари и секс, па бидете внимателни.

Сте разговарале за вашето финансиско минато: Да се биде возрасен значи самите да управувате со вашите пари. Справувањето со долговите може да биде тешко, а кога во тоа ќе се придружи уште еден, нештата можат да станат комплицирани. Па добро разговарајте со партнерот за неговото и вашето финансиско минато. Важно е да знаете како се справувате со долговите и заштедата.

Веќе планирате да купите нешто заедничко: Купувањето заеднички дом или автомобил е нормално кај сериозните врски. Доколку со партнерот веќе сте направиле вакви планови, тоа значи дека сте подготвени да ги делите вашите пари.

Спирова С. | Црнобело