5 јадења кои потекнуваат пред нашата ера – ги подготвувале и древните народи

Знаевте ли дека популарниот чизкејк го правеле и древните Грци? Кои други јадења потекнуваат од древното минато?

Благодарение на археологијата, денес знаеме многу за начинот на исхрана на нашите предци. Бидејќи во древното минато луѓето немале модерни кујни како ние, обично мислиме дека нивниот начин на исхрана бил примитивен.

Но, многу од древните јадења останале во кујните на народите ширум светот. Секако, помодерните верзии на овие јадења можеби се разликуваат, но дефинитивно потекнуваат од древното минато.

Пет јадења кои ги приготвувале и древните народи:

Чорба

Чорбата, или манџа, е мешавина на месо, зеленчук и бројни зачини. Како резултат се добива богатство на боја и вкус. Рецептите се генерално едноставни и базирани на сезонски намирници.

Подготовката на месо во течност, на оган додека не омекне, е пракса која се применувала и пред 7.000-8.000 години, со што чорбата станува едно од најстарите јадења на планетата.

Чорбата во многу култури е позната и како храна на сиромашни луѓе поради на достапноста на состојките од кои е направен.

Леб

Лебот е можеби најстарото јадење што го приготвувале луѓето.

Некои од најстарите примероци на леб е всушност таканаречен flatbread (слично како пита леб). Дел од овие археолошки пронајдоци се датирани уште пред развојот на агрикултурата.

Денес постојат многу видови леб чии рецепти се разликуваат, но генерално основата е иста - брашно и вода.

Квасецот станал состојка од лебот подоцна и се верува дека први почнале да го користат древните Египќани.

Чизкејк

Овој кремаст и богат колач се состои од тенок слој меко сирење и основа од бисквити измешани со путер или кора.

Најпозната е американската верзија од 1872 година, но оригиналната верзија потекнува од античките Грци, кои користеле едноставна мешавина на мед, брашно и меко сирење за да направат лесна торта која често ја служеле на свадби и други видови прослави.

Постои и малку модернизирана верзија на чизкејкот што го правеле древните Грци и е познат како melopita.

Пилав

Пилавот се подготвува уште од античкото време. Постојат многу начини на подготовка кои вклучуваат различни зачини, како и разни видови месо.

Ова јадење имало многу имиња, во зависност од земјата од која потекнува, а се знае дека се консумирало на Блискиот Исток, Централна и Јужна Азија, Индија...

Се верува дека први почнале да го прават древните Персијци, па и модерното име потекнува од нивниот јаизк.

Етимолошки потекнува од персискиот збор „polow“, кој потекнува од индискиот „pulao“, а коренот го има во зборот „pulaka“, што значи оризова топка.

Ќофтиња

Се верува дека ќофтињата потекнуваат уште од древна Персија, а Персијците ги нарекувале kofta.

Ги правеле од јагнешко месо, и тоа многу поголеми од денешните ќофтиња. Според некои извори, персиските ќофтиња биле големи колку портокал.

На месото му додавале зачини, особено шафран, а пред печење ги премачкувале со жолчка од јајце.

Денес ќофтињата и слични специјалитети од мелено месо се популарни во скоро секоја земја, вклучувајќи и кај нас.

Ашера | Црнобело