Прекрасни работи кои се случија во светот во 2018 (втор дел)

Италијанскиот илустратор Мауро Гати се уморил од секојдневието исполнето со црна хроника и лоши вести, па решил себе и на своите следбеници на Инстаграм да им приреди малку поинакво искуство.

Тој го отворил профилот „The Happy Broadcast“ и на него ги објавува своите одлични илустрации од добрите нешта кои се случуваа изминатата година.

Гати смета дека на секого му треба „противотров“ за секојдневието, па затоа и решил да го прослави секој момент кој значи славење на човековите права, емпатија, верба во човештвото, грижа и оптимизам.

На минималистички начин, тој илустрира приказни од светот, користејќи ги како извори „Си ен ен“ и „Би би си“. Преку својот профил, тој сака да докаже дека и покрај немилите настани, сепак постојат и убави нешта по кои вреди да се памети 2018-та.

Првиот дел погледнете го тука, а во продолжение уште неколку од неговите омилени стории:

Јаглеродниот отпечаток на просечен Американец се намалил за 9%, поради тоа што луѓето јадат помалку телешко месо, а повеќе зеленчук.

Само еден обичен тест со плунка може да даде многу повеќе податоци за здравствената состојба и да помогне да се предвидат инфаркти и мозочни удари.

Најмалку пет години нè делат од користење на енергијата од „минијатурни сонца“, што се всушност нуклеарни фузиски реактори кои може да произведат евтина и чиста енергија.

Границата меѓу Етиопија и Еритреја се отвори по 20 години војна и крвопролевање.

Шкотска стана прва држава во светот која им дава бесплатни санитарни производи на жените со ниски примања и на студентките.

Бројот на единки на тигар во дивините на Непал се дуплирал во последниве десет години.

Жените од Саудиска Арабија и официјално повторно може да добијат возачка дозвола и да управуваат со возило.

Бил Гејтс донира 12 милиони долари за помош за развој на универзална вакцина против грип.

Франција забрани супермаркетите да фрлаат храна која е на одредено време пред истекување на рокот. Тие мора да ја донираат, во спротивно може да бидат казнети.

Е. Д. | Црнобело