Како бајките пренесуваат погрешни лекции и сфаќања на децата?

Бајките сите ги сакаме и не можеме ништо против тоа, но родителите мора да бидат искрени со своите деца - тоа се само бајки и се далеку од реалноста.

Речиси секое дете ужива слушајќи ги приказните за Снежана, Пепелашка и Аурора, но за жал, овие бајки се далеку од она што реално биле.

Веќе знаеме за оригиналните бизарни и морничави верзии на приказните на браќата Грим и како тие претрпеле измени и адаптации за да бидат прифатливи за деца.

Сепак, многу родители сметаат дека и понатаму нешто не е во ред со овие приказни, особено во време кога сите сме еднакви и кога треба да нема поделби по каква било основа.

Ова се најчестите начини на кои бајките пренесуваат погрешни пораки, а кои родителите ги забележале:

Девојките може да бидат спасени само од мажи

Принцот дојде со чевличката на Пепелашка, друг принц ја бакна Аурора и ја разбуди од стогодишен сон, а трет принц ја „оживеа“ Снежана исто со бакнеж.

Многумина се согласуваат дека ваквиот пристап е навредлив и кон мажите и кон жените, бидејќи на машкиот бакнеж му се дава натприродна моќ, а на жената ѝ се одзема индивидуалноста и способноста сама да се снајде.

Крајна цел е бракот

„Си живееја среќни засекогаш“ е реченица која ја има во секоја бајка, па која може да создаде лажни очекувања и кај мажите и кај жените.

Во сите бајки крајна цел е венчавка и создавање семејство. Но, постоеле, постојат и ќе постојат оние кои сакаат да постигнат и други нешта, а бракот не е меѓу нив.

Во бајките ретко има диверзитет и има искривени стандарди за убавина

Долго време убавите принцези од бајките имаа порцеланска кожа, носат мал број чевли, преслаби се, постојано имаат црвен кармин, а очите им се крупни и сјаат со неприроден сјај.

За среќа, Дизни почна да ги решава овие проблеми воведувајќи ги во принцезите и Покахонтас и Мулан и Моана и Јасмин.

Женските ликови се врзани или со дом или со маж

Додека Пепелашка чистеше низ домот, нејзините полусестри ја бараа добрата прилика за мажење. Џуџињата копаа во рудникот, а Снежана им вареше чорба и им ги переше униформите...

Секогаш имаат лоша маќеа, полусестра или има љубоморна противничка која станува вештерка

Дури и негативните ликови во бајките се најчесто жени, кои се злобни, љубоморни и фрустрирани. Многу пати токму предрасудите од бајките биле виновни за неприфаќање на маќеата или раздор помеѓу браќа и сестри кои делат еден родител.

Е. Д. | Црнобело