Зошто некои луѓе се „послатки“ на комарците отколку други?

Реакцијата на убодот од комарец е индивидуална за секого, но сигурно е и дека самите комарци не ги сакаат сите луѓе подеднакво.

Феноменот на обожавање на одредени личности од страна на комарците е доста чест, а ова е еден од ретките случаи кога на луѓето баш и не им одговара да бидат сакани од некого.

Во светот постојат над 3.000 видови комарци кои касаат луѓе. Некои се сосема безопасни, додека пак други пренесуваат заболувања како зика и маларија.

Но, она што е интересно во светот на комарците е дека се навистина пребирливи кога треба некого да каснат. И додека едни се среќни што комарците ги заобиколуваат, други поминуваат со неколкудневно чешање, а трети добиваат и трајни белези.

Дали постои нешто што ги привлекува комарците кон вас?

Науката нема цврсти докази околу оваа проблематика. Сепак, некои истражувања покажале дека луѓето кои имаат потенка кожа и површински крвни садови, кои се потат, но и кои јадат храна со лук и оцет, повеќе ги привлекуваат комарците.

Исто така, тие се привлечени и од хемиските испарувања од нашите тела. Поради работата на метаболизмот, во зависност од храната, телото добива специфичен мирис, што во комбинација со непатогените микроорганизми на површината на кожата, ве прави примамливи (или одбивни) за комарците.

Кога потта ќе се измеша со микробите и честичките на нашата кожа, создаваме уникатен печат според кој комарецот препознава дали би му биле вкусен плен или не. Така, може да се заклучи дека не ги привлекуваме со физички изглед или карактер, туку со тоа што го имаме на кожата.

Е. Д. | Црнобело