Во Шведска отворена првата продавница без каси и продавачи

Една хаотична ноќ, додека детето гладно врескало на задното седиште од автомобилот, а таткото чекал ред во најблискиот отворен супермаркет, била причината кај Роберт Илијасон да се јави генијална идеја - продавница без гужви, каси и продавачи.

Неколку години подоцна ја развил идејата, за денес во Викен, Шведска, да ја отвори првата продавница без каси и касиерки, која работи 24 часа.

Купувачите треба да ја симнат апликацијата за да можат да ја отклучат вратата од продавницата со својот мобилен телефон. Самата апликација исто така ги препознава кодовите на производите, па на крајот од месецот им пристига сметка со трошокот.

„Идејата ми е да ја раширам оваа идеја и во другите села и помали гратчиња. Неверојатно е како никој досега не се сетил на вакво нешто,“ вели сопственикот.

Тој е единствениот вработен кој се грижи за продавницата и негова единствена работа е полиците постојано да бидат полни.

Во продавницата не се продаваат алкохол, лекови и цигари, а покрај тоа нема каса со пари, па веројатно затоа досега немало никакви инциденти.

Сепак, има поставено 6 сигурносни камери, а и самиот тој живее во близина, па доколку има проблем може да пристигне за неколку минути и да повика полиција.

М. Д. | Црнобело