6 потсетници за оние кои мислат дека не постигнале доволно во 2024 година

Ако не сте ги оствариле сите цели за 2024-та и ако не сте ги следеле новогодишните одлуки, не значи дека исчезнала вашата вредност како личност.

Како што наближува крајот на годината, сите размислуваме за нашите достигнувања, но и неуспеси во изминативе 12 месеци.

И, обично луѓето премногу строго се критикуваат кога станува збор за остварените цели.

Обично ова се должи на фактот што на почетокот од годината си поставуаат превисоки цели и очекувања, па сега, кога наближува 2025-та, се чувствуваат лошо бидејќи не оствариле сè.

Ако и вам ве измачуваат овие мисли, можеби ќе ви помогнат следниве потсетници:

Вашите достигнувања не се поврзани со вашата вредност

Ако не сте ги оствариле сите цели за 2024-та и ако не сте ги следеле новогодишните одлуки, не значи дека исчезнала вашата вредност како личност.

Некогаш околностите се надвор од ваша контрола и без разлика колку добро планирате, сепак некои работи нема да станат реалност.

Штом сте се потрудиле и сте го дале најдоброто од себе, треба да бидете горди, дури и ако сте постигнале помалку од планираното.

Ако се споредувате со другите, само ќе се повредите

Патувањето на секој од нас е различно.

Некогаш вие ќе се движите побрзо од другите, но некогаш ќе бидете и побавни.

И, тоа е сосема во ред – секој треба да се движи со свое темпо.

Наместо да се споредувате со другите, пробајте да се споредите со личноста којашто сте биле.

А, успехот на другите гледајте го како мотивација, е на како знак дека вие вредите помалку.

Секогаш можете да се потрудите повеќе во новата година

Ако годинава не сте постигнале сè што сакате, не заборавајте дека можете да продолжите да работите на истите цели и во 2025-та.

Иако крајот на годината се чини како завршувањето на цело поглавје, 1-ви јануари сепак е само најобичен ден.

Па, не се преоптоварувајте со тоа што до тој датум не сте оставиле некоја цел.

Светот не се врти околу вашите цели

Иако можеби сега мислите дека вашите цели биле најважното нешто во светот во 2024-та, сигурни сме дека имало и безброј други работи за коишто сте се грижеле и кои го барале вашето внимание.

Ретко кој го има луксузот да може 100% од времето и енергијата да ги посвети на една цел.

Грижата за домот, за семејството, за партнерот, за здравјето – сето ова се работи што одземат многу време и енергија.

Па, пред да се разочарате со помислата дека не сте направиле ништо, бидете пореалистични и размислете колку други работи сте постигнале, а сте ги сметале за неважни.

Не чувствувајте вина бидејќи сте одмарале

Не заборавајте дека не треба да се „убиете“ од работа – одморот и релаксацијата се исто важни.

Како ќе го дадете најдоброто од себе ако ментално и физички сте преморени?

Сигурно ви оди подобро отколку што мислите

Луѓето настојуваат да бидат престроги кога се критикуваат себеси.

Што значи, веројатно 2024-та била многу подобра година отколку што мислите.

Сигурно сега, на крајот од годината сте подобра и барем малку поуспешна личност отколку пред 12 месеци.

Не сте стоеле во место и колку и мал да ви изгледа, веруваме дека сте направиле барем еден чекор напред кон вашите цели.

Спирова С. | Црнобело