10 причини зошто Финците се комплетно различни од Македонците

Во автобус не седнувате на првото слободно седиште, туку барате дали има други незафатени седишта, каде никој не седи сам. Сосема е во ред да седите во друштво и да молчите. Во продолжение десет работи за Финска и за Финците што не сте ги знаеле.

Честопати за жителите на скандинавските земји се вели дека се мошне студени, повлечени, тешко се впуштаат во разговор.

На луѓето од другите земји што одат во Финска може да им се чини како да стапнале во сосема поинаков свет, особено доколку доаѓаат од земја како Македонија, каде луѓето се мошне покомуникативни, поздравувањата со прегратки и бакнежи се сосема нормални (пред пандемија), а вистинска реткост е да видите како некој седи сам во кафуле или во ресторан.

Доколку кај наа луѓето мошне лесно се спријателуваат на Финците им треба долго време, па и неколку години за да ве запознаат и да почнат да ве сметаат за пријатели.

Кај нас е сосема нормално некого што пред неколку дена сте го запознале да го поканите дома, а за нив домот е најсветото место, каде не смеете да дојдете ненајавени.

Кај нас е нормално луѓето да се туркаат и да ви дишат во врат, а тие секогаш држат дистанца затоа што го почитуваат вашиот приватен простор.  

Во продолжение проследете десет факти што би требало да ги знаете за финската култура, што особено ќе ви бидат од корист доколку имате намера да ја посетите оваа земја.

Финците не се толку повлечени, тие ја почитуваат туѓата приватност. Не се впуштаат веднаш во разговор затоа што премногу го почитуваат вашиот личен простор.

 

Тие чекаат да видат дали вие ќе им дадете јасно до знаење дека сакате да се запознаете. Подобро е вие сами да пристапите и да се претставите. Сепак, не очекувајте дека веднаш ќе станете блиски пријатели.

За нив пријателствата се засноваат на голема доверба. Прво треба да стекнете доверба кај нив, за да може да очекувате дека ќе станете пријатели.

Може да поминат и години додека тие да оценат дека сте ја стекнале нивната доверба за да им бидете пријатели, но ако еднаш стекнете пријател од Финска тој секогаш ќе биде тука за вас.

Бакнувањето во образ и прегратките се само за пријателите со кои поминале неколку години во запознавање, со сите останати се поздравуваат само со ракување.

Во автобусите не седнуваат на првото слободно столче, туку прво бараат празни столчиња пред да седнат до некој друг. Ако треба да стојат на автобуска постојка, не се туркаат еден до друг, туку се дистанцираат, дури и кога надвор врне дожд.

Сосема е во ред да седнете во кафуле или во ресторан сами. Тоа не значи дека „се за жалење“ и немаат пријатели - туку сакаат да уживаат во тишината и мирот и да одморат.

Финците по природа се мошне скромни - кога некој се фали премногу со сопствените постигнувања, тие тоа го сметаат за некултурно.

Ако во Македонија е сосема нормално да се фалите со тоа што го знаете, тие нема да потврдат дека нешто можат или знаат сè додека и самите не се 100 отсто сигурни во себеси.

Финците се мошне директни и секогаш го кажуваат сопственото мислење. Тие не знаат да прават лице или да ви ги штедат чувствата, туку веднаш ќе ви кажат директно дали нешто им се допаѓа или не им се допаѓа. Никогаш нема лажно да ве фалат за нешто што не им се допаднало.

Сосема е во ред да седите во друштво и да не разговарате. На Македонците би им било чудно да седат во друштво и никој да не говори, во Финска е нормално да седат заедно и да уживаат во тишината.

Не трошат време на неважни разговори. Тие веднаш преминуваат на главните работи. Доколку кај нас се смета дека е некултурно веднаш да преминете на главното без претходно да поразговарате, Финците едноставно, не знаат како да водат небитни воведни разговори.

Прочитајте и Не оставаат бакшиш и уште 12 работи по кои Јапонците се разликуваат од останатите народи

Б. С. Б. | Црнобело/ фото: freepik.com/ depositphotos.com