„Госпоѓо, на велосипедска патека сте“ - Дрско ми вика „Знам“ и не се мрда

Нема ништо порелаксирачко од одење на работа со велосипед, но нема ништо поиритирачко од пешаци на велосипедска патека без основна култура. Уште не научија дека велосипедската патека е за велосипеди.

И ајде некои ќе им свирнете или ќе им кажете и се тргаат веднаш. Се занеле, секому се случува, па оние најфините дури и ќе се извинат за немарното однесување. Но, оние дрските, тие вадат од кожа.

Си оди среде велосипедска, па вие ако сакате судрете се со друг велосипед или избегнувајќи ја неа згазете пешак кој прописно си се движи по тротоарот, неа мува не ја лази.

Не реагира на свирење, а кога ќе ѝ кажете дека се движи на место кое прописно е за велосипеди, дури и ќе биде изреволтирана што сте ја предупредиле, па со носот во облаци ќе каже дека знае и ќе продолжи дрско да оди по патеката.

Дали да ја „згазите“ со велосипедот, да ја „фатите за коса“ или само да ја прашате зошто вака слободно не се движи во улицата наменета за автомобили, затоа што тоа е ист тип на прекршок? Или знае дека таму некој ќе ја качи на хауба, а вие со велосипедот попрво ќе свртите нагло и ќе паднете, отколку да ја згазнете?

И толку е потребно за да ви се расипе ден, за да се потсетите дека на култура голем дел од луѓето никогаш нема да се научат сè додека не ги удрат по џебот. И ако не се пропишат некакви казни, кај нас не се учиме на правила. Толку. Тоа е. Де жа ву.

И госпоѓава дури навредена што сте ја предупредиле, најтрагично е што утре вас ќе ве раскажува како некултурни пред народ.

Како некому со инка да му сипете во мозокот? Од покондирени тикви во градов никако напред да тргнеме.

И утре сигурно пак ќе си се движи по велосипедска патека и ќе им го загрози движењето на сè поголемиот број велосипедисти, кои за Скопје живот значат (на прагот сме од оние сиви есенски и зимски магли од загадувањето знаете). Ќе ги демотивира, ќе ги разочара, па некои тазе почнати може дури и да се откажат од намерата да одат со велосипед на работа затоа ете нема услови за движење. Плус, не сакаат со луѓе од овој тип да си го расипуваат денот.

Како да ги научиме ваквите на памет?

©CRNOBELO.com Забрането преземање и копирање. Крадењето на авторски текстови е казниво со закон.

Автор: С. С. | Црнобело