Секој маж може да добие дете, но тоа не го прави „татко“

Биолошкиот родител претпоставува дека ја заслужил љубовта на своите деца само затоа што ги донел на свет и што им дал покрив над глава, но таткото работи напорно за да ја заслужи нивната љубов. Таткото секогаш во прв план ги става своите деца, затоа што тие му значат сѐ на светот.

Што значи да се биде вистински татко? Дали тоа што сте создале живот и плаќате за животните потреби на вашето дете ве прави добри татковци? Која е разликата меѓу биолошки родител и вистински татко?

Авторката Холи Риордан своевремено објавила еден текст на оваа тема. Што значи навистина да се биде татко?

Нејзиниот текст ви го пренесуваме во целост:

„Секој може да биде татко. Секој може да направи бебе. Секој може да создаде живот, но потребно е да бидете посебна личност за да можете да го обликувате тој живот.

Не си татко само ако заработуваш доволно пари за да ги платиш сметките, или затоа што твоето име е запишано во изводот од матичната книга на родените. Не си татко само затоа што си ги пренел своите гени на следната генерација.

Тие работи те прават ‘биолошки родител’, но не те прават татко.

Татко е оној што останува до детето и покрај сѐ.

Тој којшто не заминува во оној миг кога работите стануваат тешки.

Тој не се откажува од себе, од своето семејство и не го напушта без да му рече: ‘Збогум’.

Не ги напушта своите деца, па да тврди дека дал сѐ од себе и дека не можел да направи нешто повеќе.

Таткото се труди, дури и тогаш кога чувствува дека му е непријатно, дури и тогаш кога чувствува дека повеќе нема енергија за да продолжи понатаму.

Дава сѐ од себе, за неговото семејство да се гордее со него, затоа што знае дека без разлика дали сака или не, тој е пример за неговите деца.

Тој е пример за тоа како мажот треба да ја третира жената. Тој е пример за тоа како треба да функционираат врските. За тоа како се однесуваат возрасните.

Таткото треба да им покаже на своите деца што значи почитта. Ги третира сите жени љубезно, без разлика дали е тоа касиерката во маркетот или мајката на неговите деца.

Никогаш нема да биде фатен како користи погрдни зборови за други жени.

Никогаш нема да ја крене својата рака или да удри по предметите во домот.

Никогаш нема да го загуби трпението и да ги исплаши сите.

Таткото се труди да стане најдобрата верзија од себе.

Тој не лаже, не изневерува, не пие.

Не дава лош пример за своите деца за тоа како треба да изгледа љубовта и за тоа како треба да биде третирано неговото семејство.

Таткото секогаш во прв план ги става своите деца – и тоа не само во теорија, туку и практично.

Тој прави многу повеќе од тоа да оди и само да се фали со сопствените деца.

Прави повеќе од тоа што само тврди дека децата му се најдоброто нешто што му се случило.

Таткото е тука за своите деца. Ги знае имињата на нивните омилени музички групи.

Го знае нивниот распоред на часови. Знае со какви проблеми се соочуваат во училиште и што планираат да прават во слободното време.

Таткото сфаќа дека неговата улога не завршува кога неговите деца ќе пораснат и кога ќе си заминат од домот. Кога ќе почнат да заработуваат свои пари и да го живеат својот живот.

Таткото никогаш не престанува да биде добар пример. Никогаш не си дозволува себеси да биде неодговорен, никогаш нема да ги изневери своите деца, затоа што нивната среќа му е поважна од сопствената.

Биолошкиот родител претпоставува дека ја заслужил љубовта на своите деца само затоа што ги донел на свет и што им дал покрив над глава, но таткото работи напорно за да ја заслужи нивната љубов.

Таткото дава сѐ од себе за своите деца за се грижи за своите деца, затоа што тие му значат сѐ на светот.“

Извор