Забрането за патници без ковид-19 вакцина: Австралиска авиокомпанија најави строги правила за безбеден лет

Детали

понеделник, 23 ноември 2020

Авиокомпаниите низ светот постојано се во потрага по безбедни протоколи за патувања, а директорот на Qantas најави дека е можно летањето со нив да биде забрането за патници кои не примиле вакцина против ковид-19.

Засега интернационалните летови во Австралија се забранети, но кога повторно ќе се вратат во нормала, што се очекува да биде следната година, се планира да се воведат нови правила за безбедност на патниците.

Во неколку интервјуа за австралиски телевизии, извршниот директор на авио-компанијата Qantas, Алан Џојс, потврди дека ќе бараат од луѓето потврда за вакцинација пред да влезат во авион.

„Бараме промени во условите за патување за интернационални патници, кои ќе бараат од луѓето да имаат вакцина пред да се качат во авион. Задолжителното вакцинирање за домашни летови ќе зависи од тоа што ќе се случува со ковид-19 во тој период, но за интернационални патници и за наши граѓани кои ја напуштаат земјата, мислиме дека тоа ќе биде неопходно“ – изјавува тој.

#BREAKING: QANTAS CEO confirms that proof that you've been vaccinated for COVID-19 will be compulsory for international air travel onboard his aircraft. #9ACA pic.twitter.com/dhk3Hsnxn9

— A Current Affair (@ACurrentAffair9) November 23, 2020

Според Министерството за здравство, во Австралија се планира програмата за вакцинација да започне во март 2021, а вакцината ќе може да ја примат граѓаните кои доброволно ќе се пријават.

фото: depositphotos.com

Џојс кажува дека најостварливо би било доказот за вакцинација да се чува во дигитален пасош, но тоа е уште план кој се развива од страна на авиокомпаниите и властите низ светот.

Инаку, тој тврди и дека Qantas не е единствената авиокомпанија која би сакала да го воведе овој план, со оглед на тоа што разговарал со колеги во други компании низ светот и мисли дека тоа ќе биде одлука на глобално ниво.

Сепак, ова уште не е официјална информација и не може со сигурност да тврдиме што ќе се случува наредната година со авиокомпаниите низ светот.

Мислењата за овој план се поделени – што мислите вие за ова?

М. М. | Црнобело