Чекаше 70 години за овој момент, се муртел на крунисувањето на мајка му – Детали за утрешното крунисување на Чарлс

Детали

петок, 05 мај 2023

„Берберот ме потшиша кратко и ми стави премногу гел“ – кралот Чарлс неколку децении подоцна призна зошто на денот на крунисувањето на неговата мајка бил намуртен и лут. На крунисувањето на кралицата Елизабета во 1953-та година Чарлс имал само 4 години и тој е прв британски принц што некогаш присуствувал на крунисувањето на неговите родители. Што знаеме за неговото крунисување на 6-ти мај, што го чекаше цел живот?

На свечената церемонија што ќе се одржи на 6-ти мај (сабота) Чарлс и официјално ќе биде крунисан како 40-ти по ред крал на Велика Британија.

На возраст од 74 години тој ќе биде најстариот крал што некогаш бил крунисан во британската историја, а иако имаше низа шпекулации, потврдено е дека неговата втора сопруга Камила (75) ќе биде крунисана за кралица.

Се очекува дека на церемонијата ќе присуствуваат дел од децата во кралското семејство. Принцот Џорџ (9) ќе има посебна улога за време на церемонијата, а ќе се појават и другите деца на Кејт и Вилијам: принцезата Шарлот (8) и принцот Луи (5).

Додека многумина се прашуваат дали принцот Луи повторно ќе приреди вистинско шоу и ќе успее да го украде вниманието кај сите присутни, дел од медиумите ги споделуваат и фотографиите од кралот Чарлс, кој на 4 годишна возраст го следел крунисувањето на неговата мајка.

На фотографиите малиот Чарлс намуртено гледа кон камерите, додека седи помеѓу неговата тетка, принцезата Маргарет и кралицата мајка, а неколку децении подоцна, откри дека бил многу лут затоа што кралскиот бербер му ја потшишал косата премногу кратко и му ставиле гел за да му ја наместат фризурата.

Пред крунисувањето, тој успеал да ја земе круната на мајка му која тежи околу 2kg, по што присутните се уплашиле дека ќе му падне и ќе ја оштети, а се верувало дека тоа е мошне лош предзнак.

За среќа, присутните веднаш успеале да му ја земат круната и да ја стават на соодветното место. 

Тој велеше дека со денови ја гледал мајка му како пред крунисувањето вежбала да ја носи круната на главата, а во изминативе денови и самиот Чарлс мораше да вежба и да помине повеќе проби за настанот, пред и официјално да стане крал. 

Инаку, церемонијата ќе трае околу 2 часа, а се очекува настанот да го следат милиони луѓе од целиот свет. Засега потврдено е присуството на принцот Хари, а Меган Маркл ја одби поканата.

Поради крунисувањето, понделеник (08.05) ќе биде неработен ден за граѓаните во Велика Британија.

Погледнете уште неколку фотографии од Чарлс за време на крунисувањето на мајка му:

Б. С. Б. | Црнобело