Била најпозната плејбој зајачица, сопругот ја силувал и убил од љубомора: Трагичната судбина на Дороти Стратен, која ја глуми Никола Пелц

Детали

четврток, 29 декември 2022

Во новата мини-серија Welcome to Chippendales, Никола Пелц има мала улога и ја глуми Дороти Стратен – 20-годишна плејбој зајачица која беше нарекувана „следната Мерилин Монро“, но која трагично го изгуби животот откако беше силувана и застрелана со пушка од љубоморниот сопруг.

Никола Пелц го имаше своето актерско деби во мини-серијата Welcome to Chippendales, каде што ја глуми плејбој зајачицата Дороти Стратен која беше убиена од сопругот на само 20-годишна возраст.

Никола Пелц во серијата

Трагичната смрт на Дороти, која беше нарекувана „следната Мерилин Монро“, е инспирација за неколку филмови, а според многумина, нејзината приказна одлично ја прикажува негативната страна на забавната индустрија.

Новата серија се фокусира на Chippendales – првиот стриптиз клуб во САД во кој настапуваат само мажи. Убиецот на Дороти, Пол Снајдер, е еден од основачите и управителите на клубот.

Иако Дороти има многу мал дел во серијата, нејзината трагична приказна вреди да се слушне.

Никола Пелц во серијата

Дороти Стратен била родена во 1960 година во Канада, а го запознала Пол Снајдер во 1978-ма, кога имала едвај 17 години. Тогаш Пол имал 26 години.

Дороти одела во средно училиште и работела како келнерка бидејќи со мајка ѝ биле во тешка финансиска состојба.

Пол, кој наводно бил и макро, не останал рамнодушен на убавината на Дороти, па почнал да ѝ купува скапи подароци, па дури и отишол со неа на нејзината матурска вечер.

Но, додека Дороти мислела дека станува збор за љубов, Пол само сакал да ја искористи за да заработува од неа и нејзината убавина.

Според Daily Mail, кога првпат ја здогледал Дороти, Пол бил со пријател на кого му рекол:

„Оваа девојка може да ми заработи многу пари“.

Не поминало многу време од првата средба на Дороти и Пол, пред тој да почне да ја убедува да позира гола за Плејбој.

„Му требаше време да ме убеди да направам неколку тест-фотографии. Никогаш се немав соблечено пред личност што не ја познавам. Ми требаа околу две недели да се согласам“, изјавила Дороти во старо интервју за канадска телевизија.

Бидејќи Дороти не била полнолетна, морала да ја убеди и мајка си да потпише дозвола за фотосесијата.

Штом ги направила фотографиите, Дороти станала ѕвезда преку ноќ, па од Канада се преселила во Лос Анџелес за да почне да работи како модел за Плејбој.

Кариерата на Дороти одела во нагорна линија и самиот Хју Хефнер сметал дека ѝ претстои блескава иднина, но и дека вреди да си ја проба среќата како актерка.

Дороти и Хју Хефнер

Во 1979 година, Дороти се појави во две телевизиски серии и доби мали улоги во неколку филмови.

Според некои извори, овој период Хју Хефнер ја советувал да се оддалечи од Пол Снајдер и го нарекол макро.

Всушност, Дороти била предупредувана и од други познаници кои добро го знаеле Пол Снајдер и сметале дека е опасна личност.

Како што популарноста на Дороти се зголемувала, Пол Снајдер станувал сè пољубоморен, па со надеж дека ќе има поголема контрола над неа, ја побарал за жена.

Дороти не ги слушала предупредувањата, па се венчала со Пол на 1-ви јуни 1979 година.

Дороти и Пол Снајдер

До 1980 година, Дороти беше една од најпознатите плејбој зајачици и почнала да добива поголеми филмски улоги.

Истата година, Дороти го снимаше филмот They All Laughed, во кој глуми и Одри Хепберн, и многу се зближи со режисерот Питер Богданович.

Таа и се вљубила во него, па се разделила од Пол Снајдер.

Пол пробувал да ја врати, но таа му рекла дека сака и развод. Па, Пол решил да купи оружје.

Дороти и режисерот

На 14-ти август 1980 година, Дороти отишла кај Пол со цел да преговара за разводот, но нештата брзо тргнале во многу погрешна насока.

Според друга плејбој зајачица, Хју Хефнер пробувал да ја спречи Дороти да оди кај Пол бидејќи стравувал за нејзиниот живот:

„Хеф ѝ забрани да оди кај него. Дороти мораше да се искраде, мораше да лаже. Многу лошо го процени Пол. Тоа ѝ беше единствената мана – не можеше да ја види злобата кај луѓето“.

Дороти и Пол Снајдер

Дороти и Пол почнале да се расправаат додека таа била кај него, по што тој ја силувал. Потоа ја застрелал со пушка и Дороти веднаш починала.

Истата вечер, Пол се убил и самиот со истата пушка.

По убиството, студиото 20th Century Fox одби да го издаде филмот на Богданович поради трагичната судбина на Дороти.

Дороти и Питер

Но, режисерот, иако наводно потресен од смртта на саканата, решил самиот да го доврши филмот и самиот да го дистрибуира.

За ова потрошил пет милиони долари, но филмот заработи едвај еден милион, по што Богданович прогласи банкрот.

Питер Богданович

Според некои извори, Хју Хефнер бил многу попогоден од смртта на Дороти, а се чувствувал уште полошо кога Богданович издаде книга – The Killing of the Unicorn – во која го обвинува него за трагедијата.

Според книгата, Хефнер го направил животот на Дороти мизерен, наводно бидејќи таа одбивала да спие со него.

Хефнер доживеал и мозочен удар кога дознал што сè напишал режисерот за него. Но, тој возврати на критиките на режисерот, изјавувајќи дека неговата афера со Дороти е единствениот виновник за смртта.

Дороти и Хју Хефнер

Хефнер изјави и дека режисерот пробувал да ја заведе помалата сестра на Дороти која тогаш имала само 13 години.

Режисерот го негираше ова, но во 1988 година навистина се венча со сестрата на Дороти. На денот на венчавката, тој имаше 49, а таа само 20 години.

Уште побизарно е што пред свадбата ја натерал да направи пластична операција за повеќе да личи на сесра ѝ Дороти.

Парот се разведе во 2001 година, а режисерот почина во јануари 2022-ра.

Богданович и сестрата на Дороти

Спирова С. | Црнобело