Паѓање на косата, стрии: Ешли Греам ги покажува промените на телото по бременоста за кои ретко се зборува (фото)

Детали

четврток, 01 декември 2022

Многу жени се соочуваат со паѓање на косата во текот на бременоста, но ова е симптом за кој се зборува навистина ретко. Сакајќи да ја зголеми свесноста за ова, но и да им помогне на новите мајки да си ја вратат самодовербата, Ешли Греам покажа како навистина изгледа нејзината коса, но и нејзиниот стомак, 10 месеци по породувањето.

Ешли Греам е една од ретките славни личности кои отворено зборуваат за промените на телото кои доаѓаат со бременоста.

Факт е дека ретко се зборува за тоа колкав предизвик е бременоста за секоја жена, а тоа што новите мајки се бомбардирани со фотографии од славни жени кои изгледаат совршено по породувањето дефинитивно има влијание врз нивната самодоверба.

Покрај вишокот килограми кои се најнормална појава за време на бременост, овде се и стриите на стомакот и градите, па дури и паѓањето на косата.

Неодамна, Ешли сподели неколку фотки на кои покажува како навистина ѝ изгледа косата 10 месеци по породувањето.

Кај некои жени, вклучувајќи ја и Ешли, косата се проретчува во текот на бременоста. Причината за ова е намалување на нивото на естроген.

Иако ова паѓање на косата не треба да биде причина за загриженост, секако дека ќе има влијание врз самодоверба на жената.

Во некои случаи, паѓањето на косата може да продолжи и извесен период по бременоста, односно околу 3-4 месеци по породувањето.

По околу една година од породувањето, косата би требало да се врати во нормала.

На фотките на Ешли се гледа дека нејзината коса почнала да расте, но сега има многу таканаречени бебешки влакна кои е невозможно да ги „смири“.

Неколку денови претходно, Ешли сподели и фотографија од нејзиниот стомак на Инстаграм Стори.

Како повеќето жени, и Ешли има стрии по бременоста и нејзината кожа не е воопшто затегната.

„Здраво ново стомаче. Изгледаш многу поразлично од она на коешто сум навикната. Но, те ценам“, пишува на објавата.

Стриите на стомакот се најнормална појава за време на бременоста. Како што расте стомакот, кожата на него се растегнува, па се појавуваат стрии.

Кај некои жени стомакот се враќа во нормала кратко по породувањето, но кај некои стриите и олабавената кожа остануваат.

Ова зависи од многу фактори, како возраст и генетика, и важно е да знаете дека дури и стомакот да не ви се врати во нормала, нема од што да се срамите и ова не треба да влијае врз вашата самодоверба.

Можете да го подобрите изгледот на стомакот со вежбање и здрава исхрана. Но, ако сте се породиле со царски рез, задолжително разговарајте со лекар кој ќе ви каже кога е безбедно да почнете со вежбање.

Како што веќе спомнавме, важно е да знаете дека сите овие промени се најнормални и пробајте да ги гледате како показател за што сè е способно вашето тело.

Бременоста е огромен предизвик и не треба да се чувствувате лошо поради промените што се случуваат.

Спирова С. | Црнобело