Брус Ли починал затоа што испил премногу вода – Нови теории за мистериозната смрт на познатиот актер

Детали

вторник, 22 ноември 2022

„Држел диета на водена база, а смртта настапила затоа што бубрезите не успеале да го исфрлат вишокот течност од неговиот организам“ – тврдат лекарите 50 години по смртта на актерот Брус Ли. Дали конечно е решена мистеријата за неговата смрт?

Смртта на познатиот актер Брус Ли речиси 50 години е предмет на теории на заговор и шпекулации.

Се знае дека актерот починал во сон откако претходно земал лек против болки додека бил кај тајванската актерка Бети Тинг Пеи, а причините за неговата прерана смрт со години не се познати.

Брус Ли починал на возраст од 32 години во 1973-та година во Хонг Конг. Аутопсијата покажала дека тој има голем оток на мозокот, а се претпоставуваше дека тоа било предизвикано од лековите што актерката му ги дала.

Според теориите на заговори, Брус Ли бил убиен од страна на кинеската мафија „Тријада“ затоа што одбивал да плати рекет, потоа се појавија шпекулации дека имал афера со актерката Тинг која го убила од љубомора, затоа што актерот не сакал да ја напушти сопругата Линда Ли со која имаше две деца Шенон и Брендон.

Некои теории на заговор одат дотаму што тврдат дека актерот бил убиен од страна на монаси кои биле гневни затоа што тој ги откривал тајните за боречките вештини на странци, а според други, пак, актерот потекнува од проколнато семејство.

Наводно Брус имал постар брат, кој исто така починал во младоста и многумина шпекулирале дека нивното семејство е проколнато да нема машки наследници.

Сега, речиси 50 години подоцна, лекарите дојдоа до ново тврдење што може да открие која е причината за смртта на Брус Ли.

Според информациите објавени во Clinical Kidney Journal, Брус Ли починал од хипоанатремија, односно вишок вода во организмот.

„Во состојба на хипоанатремија нивото на соли во крвта – што на телото му се потребни за балансирање на течностите - е ненормално ниско“ – се појаснува во статијата.

Според лекарите, заради оваа состојба сите клетки во телото почнуваат да отекуваат, па дури и мозокот.

Според студијата, Брус со својот начин на живот бил во ризик од хипоанатремија, затоа што се знае дека пиел огромни количества вода, користел канабис, што исто така ја зголемува жедта, а користењето на лекови и алкохол го нарушувале работењето на бубрезите.

Неговата сопруга Линда откри дека актерот пред смртта бил на течна диета што се состоела само од сокови од јаболка и моркови.

„Ние заклучуваме дека Брус Ли починал од посебен вид на пореметување на бубрезите: неможност да се исфрли доволно вода од организмот, што понатаму довело до хипоанатремија, отекување на мозокот и смрт“- стои во истражувањето.

Се знае дека неколку недели пред смртта актерот бил примен во болница откако му се слошило за време на снимањето на филмот Enter The Dragon, по што било откриено дека има отекување на мозокот, а тогаш признал и дека консумирал непалски хашиш непосредно пред снимањето.

Дополнително, според биографијата, Брус Ли дента пред смртта се жалел на главоболки, а наводно во текот на денот најмалку трипати консумирал марихуана и се верува дека заради тоа внел повеќе течности во организмот од потребното.

Б. С. Б. | Црнобело