Иако не се поднесувале, постои причина зошто принцот Филип одеше зад ковчегот на Дијана

Детали

сабота, 29 септември 2018

Во прв момент не било предвидено принцот Филип да биде во првиот ред на поворката, веднаш зад возилото со посмртните останки на починатата Дијана.

Откако светот дозна за трагичната смрт на обожаваната принцеза, иако веќе не беа во брак, се очекуваше дека таа ќе добие погреб со кралски почести.

Најпрво било предвидено зад возилото со ковчегот да одат принцот Чарлс, нејзините синови Вилијам и Хари и брат ѝ Ерл Спенсер. Многумина во тоа време беа изненадени што и принцот Филип беше на чело на поворката, иако тој и Дијана не негуваа симпатии еден кон друг.

Причината зошто тој се нашол таму е откриена во книгата „My Husband And I: The Inside Story of the Royal Marriage“ на Ингрид Сувард. Ерл Спенсер верувал дека тој треба да биде единствениот кој ќе ја води поворката, со оглед на тоа што Дијана веќе не била во брак со принцот Чарлс, но кралското семејство ја отфрлило таа идеја.

Во книгата се открива и дека Ерл и Чарлс се скарале пред погребот, но правилата биле јасни - принцот Чарлс заедно со синовите Вилијам и Хари ќе бидат на чело на поворката, без оглед на тоа што семејството на Дијана чувствува кон нив приватно.

Но, како се случи принцот Филип да се најде таму?

Принцот Вилијам демонстративно одбил да биде предводник на поворката, доколку до него не биде неговиот дедо. Иако принцот Чарлс се спротивставил во прв момент, принцот Филип ја смирил ситуацијата со своето согласување да биде веднаш до својот сакан внук, со кој и до денеска се многу блиски.

Нивниот однос не се променил дури ни кога принцот Филип и принцезата Дијана биле во најлоши односи. На Вилијам му била потребна поддршката од членот на семејството на кој најмногу му верува и со кој е најблизок, за да може да го издржи она што и денеска го нарекува најтешко нешто што морал да го направи во животот.

Е. Д. | Црнобело