„Кинематика“ – Во светот на филмската музика на Дуке Бојаџиев

Детали

среда, 15 јануари 2025

Годинава, еден од најзначајните македонски композитори за филмска музика, Дуке Бојаџиев, ја одбележува својата дваесетгодишна интернационална кариера со уникатен концертен настан – „Кинематика“. Овој целовечерен концерт ќе ги пренесе слушателите низ најзначајните моменти од филмското творештво на Бојаџиев, создавајќи емотивно патување кое ја истакнува убавината на филмската музика и нејзината моќ да ги допре најдлабоките делови од човечката душа.

Дуке Бојаџиев е композитор, пијанист и продуцент со меѓународна кариера што трае повеќе од две децении. По дипломирањето на Медицинскиот факултет во Скопје, ја следи својата страст кон музиката и студира на престижниот музички колеџ „Беркли“ во Бостон. Неговото патување продолжува во Њујорк, каде создава музика за филмови и настапува на светски познати сцени. Од Карнеги Хол до најголемите филмски фестивали во светот, Дуке Бојаџиев изгради уникатен пат како композитор, пијанист и продуцент. Неговата музика е спој на класичната традиција и современата иновација, секогаш истражувајќи ја врската помеѓу звукот и човечката емоција. Со над 20 години меѓународен успех, Бојаџиев продолжува да ја редефинира улогата на филмската музика во живата изведба.

„Кинематика“ не е само концерт – тоа е искуство кое ги обединува музиката и филмската уметност, потсетувајќи нè на нивната длабока поврзаност и способност да допрат до глобалната публика. Со поддршка од врвни музичари и со свежи аранжмани, оваа вечер ќе биде искуство кое ја слави моќта на музиката да раскажува приказни, да ги спојува луѓето и да инспирира.

Изведувачи:

• Дуке Бојаџиев - пијано
• Злата Тошевска Димовска - сопран
• Климент Тодороски - 1ва виолина
• Милена Тодороска Мургоски - 2ра виолина
• Марија Димитријевич - виола
• Енис Аљи - виолончело
• Мартин Ѓаконовски - контрабас
• Павел Ренџов - тапани, перкусии

Локација: Филхармонија

Датум: 7ми февруари, 2025

Време: 20:00 часот

Билети: mktickets.mk

Ексклузивен спонзор: Халкбанк

Не пропуштајте го овој исклучителен концерт кој ја слави магијата на филмската музика!