Заврши првиот European Film Challenge во Македонија – победникот ќе оди на Берлинале 2020

Изминатава есен за прв пат во Македонија, беше организиран европскиот филмски предизвик, или European Film Challengе, а на почеток на годинава прогласена е победничката што ќе отпатува на Интернационалниот филмски фестивал во Берлин – Берлинале 2020.

Моника Зафировска е прва на листата на учесници во предизвикот, со најголем број на освоени поени, или вкупно 106 поени. Филмовите ги гледала на филмските фестивали во Македонија и на легалните VOD платформи - што и’ донело бонус поени и значителна предност пред останатите учесници.

Кон крајот на месец февруари, таа ќе отпатува во Берлин, каде ќе и’ се придружат и останатите победници од другите земји каде есенва се случуваше European Film Challenge. Тие се подготвуваат да присуствуваат на светските премиери што ќе се случуваат годинава на Берлинале, како и на многу забави и  дружење со европската филмофилска заедница.

„Моника не само што ужива да гледа филмови, има планови и да прави филмови. Сака да се запише на режија, а голема инспирација и' се жените во филмската индустрија, особено успесите на Теона Митевска и Тамара Котевска! Среќни сме што ја запознавме Моника и среќни сме што во првиот #EuropeanFilmChallenge имаме вистински филмофил за победник!“ – изјавија од организацијата на European Film Challenge, што во Македонија го имплементира Центарот за социјални иновации Блинк 42 – 21, со поддршка од програмата на МЕДИА – Креативна Европа и Европската Филмска Индустрија.

Почнувајќи од 25ти октомври до 10ти јануари, учесниците во европскиот филмски предизвик се регистрираа на официјалната страница и ги запишуваа своите поени од гледаните филмови во трка за главната награда - билет за филмскиот фестивал во Берлин – Берлинале 2020.

Првиот циклус заврши, но следуваат нови предизвици од European Film Challenge во 2020 година – билет за престижниот филмски фестивал во Кан и за Венеција Филм Фестивал.

Следете ги каналите на European Film Challenge на социјалните мрежи и бидете во тек со најновите информации за предизвиците и наградите што следуваат.