Познатите се збогуваат од маестро Џамбазов: „Каква љубов ширеше, секогаш имаше по некој виц и приказна од својот арсенал“

Детали

вторник, 25 јануари 2022

„Секогаш имаше по некој виц да ти раскаже и по некоја приказна од својот арсенал“ – вели актерката Весна Петрушевска за познатиот македонски композитор и диригент Александар Џамбазов кој денес почина во 85-тата година од животот.

Со објава на фотографии на социјалните мрежи и емотивни пораки голем број од познатите личности во Македонија се простуваат со Александар Џамбазов.

Александар Џамбазов почина во 85-тата година од животот, а за само една недела, односно на 3-ти февруари требаше да го прослави својот 86-ти роденден.

Во продолжение погледнете дел од објавите на социјалните мрежи:

Каролина Гочева на Инстаграм Стори објави нивна заедничка фотографија на која напиша:

„Што муабет си изнаправивме овде… Почивај во мир наш маестро, кроток и добар чичко Ацо“

Весна Петрушевска објави селфи фотографија на која е заедно со Александар и до која напиша:

„Единствениот маестро за мене во мојот живот, кроток, мил, зборлест, духовит, вечно вљубен во својата Анче, постојано загрижен за своите Тања и Игор…

Што седења сме си имале пред Војна болница кога Игор имаше проблеми со здравјето, колку тајни ми има кажано за македонските пејачи затоа што бев многу љубопитна.

Секогаш имаше по некој виц да ти раскаже и по некоја приказна од својот арсенал. Те сакам мој маестро и треба да си во алејата на великаните без збор!!!“

Александар Митевски на Фејсбук објави нивен заеднички портрет до кој напиша:

„Почивај во мир, драг маестро.

Музиката на сечие детство и младост.“

Драган Спасов Дац исто така имаше кратка објава на социјалните мрежи во која напиша:

„Прекрасен композитор, прекрасен човек.

Почивај во мир маестро.“

Кристина Арнаудова напиша:

„Еден и единствен, Маестро Џамбазов, почивај во мир. Најдобриот, милиот, насмеаниот, прекрасниот Маестро денес се одјави… Каква љубов ширеше каде и да се појавеше! Ти благодариме за сѐ што ни остави Маестро!!!“

Македонскиот оперски пејач Благој Нацоски на својот профил на Фејсбук напиша:

„Почивај во мир и вечна ти слава драг Маестро.

Македонија денес губи добрина, интелигенција, маестралност, но ти ќе останеш бесмртен засекогаш во нашите срца како и целото творештво што ни го оставаш.“

Давид Темелков исто така остави кратка објава на социјалните мрежи:

Драг Маестро.

Годините брзо поминаа и не успеав во живо да ти се заблагодарам! Ти благодарам што ми го одреди патот кој го чекорам, колку и да е трновит, си го сакам, мој е.

Ти го потврди талентот кој го носам, ти ме усмери. И кога бевме на раскрсница, ти се појави случајно да не исправиш. Ќе те носам во најубавите детски сеќавања, како и секое славејче кое за прв пат запеaло со тебе и поради тебе!

Царство Небеско наш МАЕСТРО!

 Б. С. Б. | Црнобело