Францускиот институт во Скопје прослави 40 години на креативна размена меѓу Франција и Македонија

Детали

четврток, 10 април 2014

Во пригодна атмосфера и во присуство на многу пријатели, соработници и гости Францускиот институт во Скопје синоќа го прослави својот 40ти роденден, но како самите тие милуваат да кажат ова беше одбележување на 40 години плодна и успешна креативна соработка меѓу нашата земја и Франција.

„Ни претставува особена чест да го одбележиме нашето 40 годишно континуирано присуство во Македонија и да ја прославиме плодната културна размена и добрите односи кои ги негуваме со вас. Досега имаме остварено бројни парнерства, проекти, фестивали и активности сакајќи што повеќе да ја доближиме француската култура и општеството  на овие простори. Се надеваме дека успеавме во тоа и дека и во иднина ќе продолжиме да го надоградуваме пријателството и партнерството преку размена на културните практики на двете земји“, изјави г-дин Жан-Ив Лавоар, Директор на Францускиот институт во Скопје и Советник за култура и соработка при Амбасадата на Франција.

Францускиот институт во Скопје е еден од најважните актери на македонската културна сцена. Преку филмовите, музиката, театарот, книжевните средби, дебати и бројни други активности нивното делување има за цел  да го претстави и доближи  современото француско творештво на овие простори и да црпи повратна инспирација од нашата култура.

Доказ за нивната успешна сорабтока со Македонија  се бројните активности и настани  кои многу брзо се најдоа на мапата на најважните културни случувања кај нас.

Специјално по повод 40 години постоење на Францускиот институт во Скопје, како најстара странска културна институција во Македонија, беше изработено видео од страна на Универзитетот за аудиовизуелни уметности ЕСРА во Скопје:

Иститот е достапен и на нивната веб страница  www.ifs.mk: „40 години со вас!“