Славчо Попоски, метеоролог: „Оваа недела постудено време, со температури и до -10 степени Целзиусови“

Детали

понеделник, 03 февруари 2025

„Наутро температурите во делови и од Македонија, особено во Пелагониско и беровскиот регион, ќе се спуштат и до околу -10 степени Целзиусови“, вели Славчо Попоски за претстојната недела.

Оваа зима не почувствуваме некој голем студ и температурите главно се над нулата.

На пониските места, немаше ни многу врнежи од снег.

Сепак, во првата недела од февруари изгледа ќе го почувствуваме зимскиот студ, со утрински температури и до -10 степени Целзиусови.

Во продолжение, прогнозата на Славчо Попоски:

„Во текот на оваа работна седмица во Македонија ќе имаме значително поладно време, односно ќе бидеме под влијание на ладна и на релативно сува воздушна маса која ќе продира од истокот и од североистокот на Европа.

Температурите позначително ќе опаднат, особено во ноќните и во утринските часови, кога минималните температури насекаде низ Македонија ќе се спуштаат под нулата, особено од оваа среда.

Повремено ќе засилува ветер од северен правец, а времето ќе биде претежно стабилно, суво и со сончеви периоди.

Наутро температурите во делови од Македонија, особено во Пелагониско, беровскиот регион, како и на планинските места, вклучувајќи ги и скијачките центри, температурите ќе се спуштат и до околу -10 степени Целзиусови.

Преку ден, пак, температурите исто така ќе бидат значително пониски и ќе се искачуваат во интервалот од 2 до 9/10 степени Целзиусови.

И во Скопје и околината ќе имаме слично време како и во останатите делови од Македонија“.

Спирова С. | Црнобело

фото: Фејсбук, freepik.com