16-минутен молк на скопскиот плоштад, тишината никогаш поболна - Собир за почит кон жртвите на пожарот во Кочани (фото+видео)

Детали

вторник, 18 март 2025

Ѕвездено небо за 59-те прерано згаснати животи, 16-минутен молк за жртвите од пожарот кој се случи на 16-ти март, транспаренти со моќни пораки, црни балони пуштени кон небото и тага која се чувствуваше во тишината и покрај огромната толпа народ која го преполни плоштадот во Скопје, во чест на загинатите во трагедијата во Кочани. 

Граѓанската иницијатива „Кој е следен“, што ги организираше протестите за правда за Фросина, денес организира мирен собир на плоштадите низ Македонија, за да се оддаде почит на жртвите кои го изгубија животот во пожарот во Кочани.

Мирниот собир се организира иницијално на плоштад Македонија во Скопје, но од организацијата повикаа истото да го направат и сите останати градови на своите плоштади.

За тоа зошто собирот е на плоштадите, а не на улиците како што многумина очекуваа, тие објаснија:

Затоа што состојбата во болниците е критична, а нашите херои се борат за спасување животи. Нашето присуство на улиците би ја отежнало нивната работа.

Ќе дојде време за протести на сите улици, но тоа време не е сега. Сега е време за сплотеност и грижа.

На скопскиот плоштад, уште пред 18 часот се собра огромна толпа народ, која заедно и сплотено тагува со семејствата на жртвите и повредените по трагедијата која ја зави цела Македонија во црно. 

„Со крвави раце ги броите парите / Летајте високо ангели, ние ќе се бориме во ваше име / Ќе немаше волку крв да беше сè по закон, Кажи ми како без тебе да бидам...“ – гласат дел од транспарентите со моќни пораки кои ги испраќаа граѓаните.

Иако беше најавено во 18:59 часот, малку порано започна 16-минутниот молк - толку многу луѓе, а толку многу тивко...

Тишина, која истовремено толку гласно „вреска“ од болка и тага која секој може да ја слушне и покрај молкот... 

По 16-минутниот молк, од толпата кон небото пуштија црни балони и се палеа свеќи во чест на прерано починатите жртви во пожарот и трагедијата која засекогаш остави рана во секој еден од нас. 

М. М. | Црнобело