Стефан Лазаров упати апел за донации за Зоки Фаци: „Не можам да седам и да гледам како пријателот ми умира“

Детали

сабота, 17 август 2024

„Изминативе неколку месеци беа навистина тешки за Зоки, но секако и за мене бидејќи неговата болка ја гледам и како своја“ – со овие зборови јутјуберот Стефан Лазаров го започна апелот за собирање донации за својот колега и пријател Зоран Василевски, попознат како Зоки Фаци.

Јавноста веќе подолго знае дека новинарот Зоран Василевски, води сериозна битка за сопствениот живот, а голем број јавни личности му дадоа поддршка, за да продолжи да се бори. Познато е дека тој веќе имаше две операции, но сега се соочува со уште поголем и посериозен предизвик.

Како што истакна неговиот колега, соработник и пријател, јутјуберот Стефан Лазаров, ќе биде потребна голема финансиска поддршка од јавноста за Зоки да може да се избори со болеста.

Тој синоќа на Инстаграм Стори објави видео во кое ја замоли и ја повика јавноста за помош, а на видеото напиша: „Да го пратиме Зоки на операција и да биде добар!“

Во видеото тој се обрати на своите фанови и следбеници и појасни каква е ситуацијата.

„За да биде јасно, Зоки има тумор којшто е 25 cm. Според она што ни го кажаа докторите, не е страшно, но тој тумор мора да се извади. Најновата информација е дека треба да се почека, да помине топлото време, некаде околу крајот на септември.

Меѓутоа секој ден веќе гледам дека е сè пострашно и пострашно, а ние само седиме и ја гледаме ситуацијата отстрана.

Не сакам да живеам со помислата во животот понатаму дека не сум направил ништо.

Јас знам дека нè гледате и дека го сакате Зоки. Но, овојпат не станува збор ниту за шоу ниту за забава, ниту за оние глупави наши шеги и сè тоа.

Сега станува збор за тоа дека треба да му го спасиме животот на Зоки. Знам дека ќе бидете со мене. Ви благодариме од срце и ќе го направиме ова заедно“ – порача Лазаров.

По големиот број упатени пораки и поддршката што ја доби Лазаров денес ја објави трансакциската сметка на која може да се донираат средства за операцијата на Зоки, која, како што појасни чини околу 15.000 евра.

Над објавата, Лазаров уште еднаш појасни за што точно станува збор.

„Изминативе неколку месеци беа навистина тешки за Зоки, но секако и за мене бидејќи неговата болка ја гледам и како своја.

Зоки има 25 cm тумор кој мора да се отстрани доколку сака да преживее. Веќе неколку месеци операцијата се одлага, а единствен начин да се оствари побрзо е тоа да биде во приватна болница во која трошоците се огромни. Зоки не сакаше да бара милост ниту некој да го жали, но лично не можам да седам со скрстени раце и да го гледам пријателот како умира.

Затоа мои добри луѓе, ве замолувам да се соединиме и да му помогнеме на човекот кој долго ве смее, да ја победи оваа битка и од понеделник да го пратиме на операција.

На сликата имате сметка за донации, а потребни се околу 15000 евра. Доколку има потреба до среда ќе отвориме и броеви. Фала ви однапред на сите, Господ да ве чува“ – напиша уште еднаш Стефан.

Погледнете ја фотографијата, каде што е објавена и трансакциската сметка за донации за Зоки:

Исто така беше отворена сметка за донации и преку eCrowd и може да се донираат средства на следниот ЛИНК.

Б. С. Б. | Црнобело