Македонка направи уникатна маска за синовите – астронаути: „Ја правевме две недели“
- Детали
- понеделник, 01 април 2024
„Чизмите им ги обмотав со алуминиумска фолија, шлемот на помалиот е кацига за велосипед надополнет со апликација, а боците со кислород се од шишиња вода, полнети со памук, кои ги поврзува црево од водоводна цевка“ – Анна (29) од Скопје за CRNOBELO.com открива како ја направила уникатната маска за синовите - астронаути на мисија на Марс и за неа, како нивна ѕвезда водилка.
Aнна Стојанова (29) од Скопје е креативна мајка, која за нејзините два сина Георѓи (3 години) и Лукас (1 година) направи уникатна маска „Мисијата на Марс, со двајца мали астронаути и една ѕвезда водилка“.
Таа работи во полето на градежништвото, а дома ужива во креативни, рачни изработки, посебно кога се за децата и ги прави заедно со нив.
За овој 1-ви април, таа поминала 2 недели собирајќи материјали и изработувајќи ја маската за нејзините мали астронаути.
За CRNOBELO.com Анна открива како изгледал процесот:
Голем љубител сум отсекогаш на креативните изработки и особено задоволство ми претставуваат сите оние што ги спремаме дома со децата.
Мојата креативност доби израз повеќе од моментите кога станав мајка, децата ми се огромна инспирација и сила да се движам напред.
Маската ја изработивме дома, во период од две недели постепено собирав материјали и ги аплицирав соодветно според нашата замисла.
Приказната започна кога за Нова година поголемиот син доби една прекрасна и поучна книга од наш драг пријател, а помалиот дрвена играчка во форма на ракета.
Може ќе звучи нескромно ама бескрајно сум си горда на трудот и благодарна што моите деца обожаваат книги и сакаат да им читам, па така се појави интересот, а подоцна се роди желбата и идејата за маската.
Костимот на поголемиот син е готов производ и тој баш обожава да се пресоблекува неколкупати на ден во сите костими што ги има дома, а за помалиот импровизирав, на бела маичка аплицирав самолеплива ознака НАСА да одговара на тематиката со брат му.
Чизмите им ги „облеков” во алуминиумска фолија.
Шлемот на помалиот е кацига за велосипед исто надополнета со апликација.
Е ранците се од празни кутии завиткани со колаж во сива боја.
Потоа, од шишиња од вода се направени „боци кислород” кои се полнети со памук, а ги поврзува црево од водоводна цевка. На нив имам додадено капи останати од родендени и реси налик на огнот на ракетата.
Внатре во кутиите имам сошиено ластик и прицврстен е со силикон да го држи сето тоа добро на грбот.
Црвената боја му е омилена на поголемиот барем засега па изборот беше да се лета на Марс и затоа и таква ни беше замислата и мисијата.
А јас морав да бидам ѕвезда да им го осветлувам патот на моите омилени астронаути, па на едно старо венче, му дадов неколку циркони и ѕвезди од светкава хартија и резултатот беше одличен.
Морам и јавно да ѝ се заблагодарам на Маја од Мала Пажња што се погрижи да ја реализира мојата замисла и да ми направи маичка во склад со децата.
И за крај бескрајно благодарна на мојот сопруг, кој има трпение и ми помага за сите мои идеи, кој умее да се радува и да го уважува мојот труд и да ни ги прави најубавите спомени секогаш“.
На следната страница повеќе фотографии од маската...
Би можело да ве интересира:
Препорачуваме
Најчитани неделава
