Браво! Сара секои 4 години ја донира својата коса за заболените од рак и ги поттикнува и другите

Детали

среда, 10 мај 2023

„Дали знаеш дека за изработка на само ЕДНА перика потребно е 10 до 15 жени да донираат плетенка? Јас, пред неколку години си донесов едно непишано правило: на секои 4 години да ја донирам косата, па и годинава го направив тоа“, вели Сара, млада и инспиративна девојка која открива каде да донирате коса во Македонија и да им помогнете на заболените од рак.

Сара е магистриран архитект, родена е и израсната во Македонија, но има живеено во Италија, додека сега живее во Париз, Франција.

Со својата другарка Кате го отвори профилот „Yes for Less“, каде порачуваат да рециклираме и да ја чуваме природата затоа што таа ни е сè.

Сега, Сара испрати уште една прекрасна порака. Покажа како на секои четири години ја донира косата за правење на перики на пациентките заболени од рак, кои ја губат својата коса за време на хемотерапијата.

Сара на Инстаграм напиша:

„Имаш долга коса и сакаш да ја скратиш? Јас најдов начин како дури ниту косата да не ми оди во отпад, туку да послужи на некој друг.

Може да ја донираш за од неа да се изработи перика и подари на деца и жени, кои се болни од рак и кои не можат да си дозволат да купат.

Главен услов е да имаш природна или фарбана коса (не смее да биде бланширана).

Кога ќе одиш на фризер, по миењето побарај да ти исплетат плетенка од минимум 20cm.

Дали знаеш дека за изработка на само ЕДНА перика потребно е 10 до 15 жени да донираат плетенка?

Јас, пред неколку години си донесов едно непишано правило: на секои 4 години да ја донирам косата.

Тогаш кога се решив за првпат немаше можност во Македонија, па ја донирав во странство.

Но, оваа година со огромно задоволство можам да кажам дека го сторив тоа преку проект кој доаѓа од нашата земја.

Се работи за хуманитарен проект на @zdruzhenie_viktori, предводен од страна на двете млади девојки Тамара и Викторија.

Случајно налетав на Тамара и ме фасцинираше нејзината приказна како на 18-годишна возраст била поттикната од болеста на својата мајка, покрај донација на својата коса, да покрене и други околу себе да донираат плетенки за да се изработуваат перики за луѓе на кои им се потребни.

Денес, таа заедно со својата другарка Викторија се главни двигатели на овој проект и велат дека има голем број на луѓе кои делат дел од себе со цел да помогнат некому. Тоа е тој ланец на позитивни промени.

Доколку сакаш и ти да донираш, сѐ што треба да направиш е да отидеш кај твојот фризер и задолжително да им се најавиш на @zdruzhenie_viktori за да се договориш за како да им ја доставиш плетенката.

Сподели ја оваа објава со некој/а на кого би му била корисна и слободно пиши ни за било какви прашања“.

С. С. | Црнобело