8 лесни трикови за автомобилот, кои ќе им го олеснат животот на возачите

Замрзнати стакла, замаглени прозорци, пневматици заглавени во кал кои шлајфуваат... Нема шофер кој барем еднаш не се соочил со некој од овие проблеми.

Дали ви се случило да ви замрзнат бришачите или стаклото да ви се замаглува кога врне, па не гледате ништо пред себе?

Овие непријатности ги искусил секој што вози автомобил.

За среќа, постојат едноставни трикови со кои можете да решите некои од овие проблеми, а и да го споделите своето искуство со пријателите, па да им помогнете и на нив.

Ова се 8 лесни трикови за автомобилот, кои ќе ви го олеснат животот:

Влажни марамчиња за подобар мирис

Ако автомобилот ви мириса чудно кога ќе вклучите ладење или греење, а озонерот не ви помага, постои лесен начин да ја намалите непријатната миризба.

На местата каде што излегува воздухот, ставете влажни марамчиња со посилен мирис, па тие ќе го намалат непријатниот мирис во автомобилот.

Ова не значи дека непријатниот мирис целосно ќе исчезне и дека влажните марамчиња се 100% решение, но ќе го ублажат, а воздухот ќе мириса попријатно од претходно.

Пена или гел за бричење против кондензација на прозорците

За да ја спречите кондензацијата на прозорците, премачкајте ги со пена или гел за бричење.

Нанесете го производот на исчистено и суво стакло со мека крпа, а потоа пребришете ја површината со хартиено шамивче.

Со весник против замаглени прозорци

Ако прозорците ви се влажни и замаглени, полесно е да ги исчистите со лист од весник, отколку со крпа.

Пелети за мачки за намалување на влажноста

Влажноста во автомобилот можете да ја намалите ако во внатрешноста ставите малку пелети за мачки.

Пелетите можете да ги врзете во стар чорап и да ги оставите покрај менувачот или на шофершајбната, а тие ќе ја апсорбираат влажноста.

Ќесе против замрзнување на ретровизорите

За да спречите замрзнување на ретровизорите, навечер заштитете ги со ќеси и тоа ќе ја намали можноста тие да бидат прекриени со мраз до следното утро, па да мора да го „гребете“ мразот за да го исчистите огледалото.

Кромид како заштита од замрзнување

Некои луѓе тврдат дека кромидот е одлична заштита против замрзнување на автомобилските стакла.

Пресечете го кромидот на половина, па премачкајте ги стаклата навечер - следното утро на нив нема да има мраз.

Со алкохол и чорапи заштитете ги бришачите

Кога температурите ќе паднат под 0, се случува бришачите да се залепат на стаклата.

За да го избегнете тоа, или премачкајте ги со алкохол или заштитете ги со чорапи, кои само ќе ги извадите пред да тргнете.

Патосница за да се „одглавите“ од кал или снег

Ако гумата на автомобилот ви е заглавена во кал или снег, најлесно ќе ја одглавите со помош на патосница.

Едноставно, поставете ја патосницата под пневматикот - наместо автомобилот да „шлајфува“ во место и да се заглавува уште повеќе, лесно ќе се помести нанапред или наназад.

А. Ј. | Црнобело