Танцот како професија и страст - Dance Team Fusion од Куманово и приказната за нивното постоење

Детали

недела, 26 август 2018

„Сите танцуваме на различни начини, а кога ќе ги споиме во едно доаѓаме до богати и разновидни движења кои не прават среќни додека ги повторуваме, а со секое ново повторување откриваме нешто ново“, се зборови на основачите на танцовото студио Dance Team Fusion од Куманово, формирано во март 2013 година од страна на Сања Лазаревска, Александра Петрушевска, Леона Стојчевска и Бојана Додевска. 

Во нивното студио, кое моментално брои околу 150 членови, се изучуваат техники на модерен танц и современ танц со акцент на кореографии и композиции кои се презентираат во Македонија и надвор од неа.

„Поголемо уживање од она да поминеш време со дете, три пати неделно, некогаш и повеќе, не постои“. Сите деца имаат свој различен и интересен свет, смешен, на моменти и страшен, нерационален и уште безброј епитети кои сега во овој момент не ни се при свест.

Кога ќе влезеш во детскиот свет се раѓаш одново, забораваш на својот и се задржуваш во таа преубава димензија најдолго што можеш. Се трудиме да им го распространиме видикот на децата, да гледаат подалеку одошто ние гледавме на нивни години.

Се трудиме да ги спремиме за она што допрва следи. Се трудиме да им обезбедиме убава атмосфера во која можат да напредуваат. Се трудиме да ги научиме да сакаат и да уживаат, не само во танцот, туку општо во животот. Се трудиме да им помогнеме во многубројните обврски и јуначки да ги издржат кондиционите и техничките часови“, споделува Dance Team Fusion.

Dance Team Fusion се посветени за тоа да ги заинтересираат помладите генерации сé повеќе да бидат љубопитни за танцот и уметноста, а велат дека тоа добро им оди.

Задоволни се од бројот на членовите на тимот, но не се задоволни од бројот на момчињата кои се заинтересирани за танцот во нивниот град, па дополнително се трудат да ги искоренат вкоренетите предрасуди во Куманово, што не е ист случај во останатите градови во Македонија, а уште помалку надвор од неа.

„За сите кореографии е потребен различен временски период, во зависност за која годишна возраст се прави кореографијата и за која цел. Секоја возрасна група си бара различен временски период и идеја.

Најчесто на часовите со дечиња од помала возраст（4-6 годинки) правиме најразлични детски и интересни комбинации и вежби кои подоцна, во текот на учебната година ги спојуваме во кореографии. Со поголемите групи, од шест години па нагоре, потребен ни е подолг временски период на учење на комбинации и изучување и усовршување на техниките.

Но, сепак некои кореографии се родени на спонтан начин и од импровизации, а за некои е потребно релативно подолг период за осмислување и увежбување“, откриваат менторите во Dance Team Fusion, кои соработуваат и со други танцови групи, како и со ред други организации и поединци во областа на уметноста.

Сметаат дека ниту една танцова група не би напредувала доколку се изолира и не комуницира, разменува мислење со останатите групи. Како плод на нивната соработка беше овогодишниот концерт, кој го реализираа заедно со Центарот за личен и креативен развој – Перципио од Куманово, каде можеше да се види спојот на театарот и танцот.

„Најголемо достигнување за нас се задоволни родители, а пред сé задоволни деца. Најголемиот успех за нас е во ситуација на неуспех да останеме сите заедно сложни и да твориме и создаваме нови успеси“, потврдува Dance Team Fusion.

Кога станува збор за награди, танцовото студио покрај многубројни награди и пехари на кои се радуваат децата, ги издвојуваат учеството на Интернационалниот фестивал за современ танц 2017 во Амстердам, каде земаа прво место и специјална награда – платено учество на интернационален натпревар во Венеција.

Во блиска иднина Dance Team Fusion во јавноста ќе објават два видео записи кои во моментот се во изработка, а во текот на годината планираат да реализирааат еден проект за деца и млади, кој веќе поодамна им стои како идеја. И секако, од септември почнуваат со работа со нивните дечиња и за сите нови заинтересирани.

Автор: Евгениј Хоуп | Црнобело