Успешни Македонци низ светот: Сестрите Анастасја и Елизабета од Скопје 12 години водат свој моден бренд во Австрија

Детали

понеделник, 18 септември 2023

„Нашата сегашна колекција е Phoenix и затоа Лила беше очигледен избор. Таа е единствена, силна жена, која и покрај ударите на судбината, секогаш станува и продолжува. Изгледа женствено и сензуално, а истовремено е многу силна. Често нѐ прашуваа која Македонка најдобро ќе го отелотвори имиџот на нашиот бренд - Лила е токму таква жена“, вели за CRNOBELO.com дизајнерката Анастасја Трајковска, која со својата сестра Елизабета стои зад успешен бренд на висока мода во Австрија.

Анастасја Трајковска и Елизабета Трајковска-Маташ, се сестри од Скопје кои долги години живеат и работат на релација Австрија – Швајцарија – Монако.

Отсекогаш ја сакале модата, па двете заедно веќе 12 години успешно го градат и развиваат својот моден бренд, Anastasja Trajkovska. Тие неодамна ја промовираа колекцијата Phoenix, чие заштитно лице е Лила Филиповска.

За успешната кариера која ја гради со сестра си, за компанијата за висока мода, но и соработката со Лила, Александра раскажа за CRNOBELO.com:

Пред извесен период во Виена фотографиравте моден едиторијал заедно со вашата сестра Елизабета и со Лила Филиповска. Зошто ја избравте токму Лила да ви биде заштитно лице?

Името на нашата сегашна колекција е Phoenix. Затоа Лила беше очигледен избор.

Таа е единствена, одлична и силна жена, која и покрај ударите на судбината, секогаш станува и продолжува.

Од наша перспектива, таа е олицетворение на фениксот.

Таа изгледа женствено и сензуално, а истовремено е многу силна.

Често нѐ прашуваа која Македонка најдобро ќе го отелотвори имиџот на нашиот бренд. Лила е токму таква жена.

Целиот тим од Скопје практично го донесе Скопје во Виена. Проектот помина совршено.

Совршено се усогласивме и така двата дена не ми изгледаа како работа, туку беа задоволство.

Живеете во Виена. Колку е тешко да се успее на деловно поле таму?

Живееме во многу различни светови. На исток и запад на Австрија, во Швајцарија и на Француската Ривиера.

Секој од овие светови има своја посебна привлечност - затоа не сакаме да пропуштиме ниту еден од нив.

Но, тие имаат едно нешто заедничко - клиентот на високата мода бара секаде висок квалитет.

Затоа не е лесно да се живее во светот на модата. Тоа е свет кој брзо се движи, а полн е со критики.

Потребна е голема истрајност додека сте растргнати помеѓу тоа да живеете најсовремено и да не се изгубите себеси.

Зошто ја избравте Виена? Колку долго живеете таму?

Двете студиравме во Виена и живеевме таму неколку години.

Затоа никогаш целосно не ја изгубивме врската со Виена.

Како би го опишале животот во австриската метропола? Што ви се допаѓа, а што не?

Виена има многу предности. Градот нуди многу култура, уметност, литература, кои и двете ги сакаме.

Живееме динамичен живот и никогаш не е здодевно.

Истовремено, има и зелени зони и се смета за еден од најбезбедните градови во Европа.

Но, тука е погласно и побурно отколку во другите два центри каде што живееме.

На истокот на Австрија, каде што се спојуваат четири земји - Германија, Австрија, Швајцарија и Лихтенштајн, часовниците отчукуваат многу побавно. Сè е помало и луѓето се познаваат преку националните граници.

Но, можете да бидете во Минхен, Милано или Цирих за два часа, а потоа каде било во светот.

Францускиот начин на живот, медитеранската клима, морето и храната се предностите на француската ривиера.

Продолжува на следната страница...