Весна Коцевска, туристички водич, за патувањето во Сицилија: „Во Палермо е многу евтино, во Катанија има многу отпад по улиците“

Детали

недела, 11 јуни 2023

„На сите им препорачувам да патуваат со деца во Сицилија. Без разлика дали би се одлучиле за летен одмор или активен како нашиот. Во однос на безбедноста ниту за момент не се почувствувавме небезбедно. Надалеку прочуената Сицилијанска мафија е присутна само во духот на филмовите кои се снимани на одредени локации и секако претставува дел од историјата на тие места“, раскажува Весна Коцевска за CRNOBELO.com.

Весна Коцевска од Охрид е туристички водич и травел-блогер, а на многумина им е позната и како @whisper.ves.

Неодамна Весна и нејзиното семејство се вратија од Сицилија, а во продолжение за CRNOBELO.com го споделуваат искуството од островот:

Зошто овојпат се одлучивте токму за Сицилија? 

Верувале или не, добив желба да ја посетам Сицилија поради телевизиската серија „The White Lotus" чија втора сезона се одвива на Сицилија.

Енергијата на Палермо, боите на Таормина и фактот дека на островот има активен вулкан само ја засилија желбата.

Па, кога видов и колку е едноставно и релативно кратко самото патување одлуката беше дека дефинитивно ќе се оди со деца.

 

Како изгледаше маршрутата на патувањето? 

Летавме од Тирана до Катанија, самиот лет трае околу 1 час. После продолживме со автобус до Палермо каде ноќевавме.

После 2 дена се упативме назад кон Катанија од каде во наредните денови ги посетивме Етна, Таормина и Сиракуза. 

Палермо – крстосница на многу цивилизации која се наоѓа на самиот раб на Европа и претставува еден од поважните центри на античкиот свет. Колку гостопримлив беше Палермо и какво беше чувството при првата прошетка низ улиците?

Палермо беше повеќе отколку што очекувавме и слободно можам да кажам дека ми стана еден од омилените градови во Европа каде би се вратила повторно.

Градот има богата историја и нуди навистина многу содржини. Може пеш да видете голем дел од знаменитостите.

Сепак, она што го прави посебен е неговата енергија и луѓето. 

Чувството при првата прошетка низ улиците на Палермо беше како да сме во град кој веќе го знаеме. Можеби и затоа што тргнавме спремни со одреден план што да посетиме.

Но, поверојатно затоа што самата атмосфера во градот беше толку позитивна што целосно се опуштивме без да брзаме да посетиме што повеќе знаменитости.

Баш напротив, избравме опуштена варијанта со мисла дека не мора сѐ да видиме затоа што сигурно повторно ќе го посетиме.

Што сè успеавте да посетите во Палермо? 

За неколку часа го прошетавме историскиот дел на Палермо. Така што првиот ден буквално шетавме по улиците без посебен план и видовме голем дел од знаменитостите.

Посетивме еден од пазарите со улична храна и ги пробавме познатите аранчини и канелони.

Наредниот ден ја посетивме ботаничката градина на Палермо која е најстара во Европа и нѐ изненади големиот диверзитет на тропски дрвја.

Истиот ден ја посетивме и Кралската палата во која се наоѓа црквата Палантине.

Од туристички водич научивме многу за историјата на Палермо и Сицилија. А добивме и појасна слика зошто Сицилија е толку посебна и поразлична од остатокот на Италија.

Патувањето го продолживте и во Катанија. Како го доживеавте овој град?

Катанија е исто убав град, но ако го посетите после Палермо не може да се натпреварува. Малку нѐ разочара колку отпадоци има по улиците.

Сепак центарот на градот е навистина убав. А она што е најдобро кај Катанија е локацијата, да се биде стациониран тука со цел да посетите повеќе места во источниот дел на островот.

Се наоѓа во подножјето на Етна, а тука се наоѓа и еден од аеродромите.

Освен Палермо и Катанија кои други места успеавте да ги посетите?

Не успеавме да посетиме сѐ од првичниот план, но сепак сме презадоволни од посетата на Сиракуза и стариот град Ортигија со значително зачувана архитектура.

Како и преубавата Таормина со познатиот остров Isola Bella. Секое место со своја убавина и своја приказна. 

Продолжува на следната страница...