10 основни правила за хармоничен и среден дом

Уредувањето на ентериерот во домот треба да биде во склад со нашите потреби и нашите интереси и претставува важен дел од нашиот живот.

Сите домови се уредени на различен начин, според желбите на сопствениците. Но, постојат неколку клучни принципи по кои треба да се водите при уредувањето на домот.

Во продолжение прочитајте ги најважните и основните 10 правила за идеално уреден дом, според професионалните дизајнери на ентериер:

Осмислете го концептот

Пред да започнете со уредување, важно е да осмислите општ концепт на просторијата. Одлучете какви бои ќе преовладуваат, каков облик ќе има мебелот, од каков материјал ќе бидат елементите и слично, која боја ќе бидат ѕидовите и слично.

На овој начин ќе добиете општа слика за тоа како ќе изгледа просторијата.

Одберете спектар на бои

Кога одлучувате за боите, најдобро е во просторот да нема повеќе од 4-5 бои, а 3 или 4 од нив треба да бидат во некоја неутрална нијанса.

Светлите бои најчесто се одбираат за ресторани или други јавни места, додека за домот идеално би било да преовладуваат неутрални нијанси со декор во некоја впечатлива, светла боја.

Ѕидовите нека бидат во неутрална нијанса

При избор на декорации и мебел, важно е да обрнете внимание како би изгледало тоа што ќе го одберете во комбинација со ѕидовите. Најдобро е ѕидовите да бидат во неутрални нијанси за да можат да дојдат до израз декорациите во повпечaтливи бои.

Неутралните нијанси на ѕидовите даваат чувство на смиреност во просторот.

Внимавајте на централниот дел од просторијата

Кога го ставаме мебелот покрај ѕидот, останува празен простор во централниот дел од просторијата.

Ова е добро решение за простории со мала површина, додека за поголем простор, најдобро би било да не оставате толку празен простор во средината на собата и мебелот да го наместите така што ќе формира една затворена целина околу централниот дел на собата.

Направете поделба по зони

Поделбата по зони му дава топлина на просторот и визуелно го зголемува.

Користете различни материјали, полици или стаклени површини за да ги одвоите различните простори во домот (просторот за спиење одвојте го од просторот за јадење, на пример).

Не претерувајте со декорации

Не ставајте премногу предмети и декорации во домот бидејќи просторот ќе изгледа натрупано. Одберете нешто што навистина ви се допаѓа и одговара во амбиентот, а ослободете се од сите непотребни предмети.

Важно е просторот да „диши“. Доволни се една рамка за слика, убава ламба или некој керамички сад.

Не ги избегнувајте завесите, перничињата и теписите

Многу луѓе не ставаат завеси, теписи или перничиња во домот, но токму овие работи направени од квалитетен материјал го оплеменуваат целиот простор и му даваат привлечен изглед и личен печат на домот.

Осветлувањето е многу важно

Природната светлина е најдобар избор, но и осветлувањето е исто така важно за изгледот на домот.

Инвестирајте во квалитетна столна ламба, ставете интересни сијалички во детската соба или закачете голем лустер над трпезариската маса.

Закачете слики или постери

Сликите и постерите на ѕидовите ставаат личен печат на целиот простор, но треба да бидат поставени на вистинската висина за да можат да се гледаат.

Ако се поставени превисоко, или прениско, ќе создадат неурамнотеженост во просторот, па затоа внимавајте на ова.

Организирајте ги ситните предмети

Чувајте ги малите предмети во декоративни кутии или садови. Така нема да се создава неред и истовремено ќе го декорирате ентериерот по своја желба.

Идеални места за да ги поставите ваквите кутии или садови се во ходникот или во тоалетот.

М. В. | Црнобело