Во градината на Викторија: „Син ми обожава да ми помага, си готвиме манџи од свежо набрани продукти“

„Мојата прабаба сè додека беше силна физички, работеше во својата градина која беше нејзина гордост, па така и јас одлучив да тргнам по нејзините стапки и сега уживам во градинарството“, вели Викторија Кочишка Димитријева за CRNOBELO.com.

Замислете да си имате своја градина од која си берете домати, пиперки, краставици и веднаш си правите салата, плус си готвите и манџа од вашата градина...

Токму вакво задоволство има Викторија Кочишка Димитријева од Скопје, која со мајка ѝ си направиле ваква градина во нивната викендичка во близина на Скопје.

Од каде инспирацијата, Викторија споделува за CRNOBELO.com:

„Додека бев мала, големиот дел од годината, посебно летните денови ги поминував во село Светорача, Кичевско. Селото во кое израснале мојот дедо, моите прабаба и прадедо со цела фамилија.

Мојата прабаба сè додека беше силна физички, работеше во својата градина која беше нејзина гордост.

Секој кој ќе и дојдеше на посета, прво го носеше да му ги покаже своите цвеќиња во сите прекрасни бои и, секако, градината со највкусните моркови, пиперки и најслаткиот компир, кој веднаш откако ќе го извадеше од земја само го миеше на чешмата и од него ни го правеше највкусниот помфрит.

Прадедо ми имаше слива и од неа правеше ракија, која секако ја обожаваа возрасните.

Во „комшии “имавме највкусен домат јабучар и до ден денес кога одиме во село си го посетуваме дедото кој го одгледува со многу труд и љубов.

Сите тие природни, домашни продукти ми останаа во сеќавање и како поминуваа годините на созревање, најголема желба ми беше да имам своја градина.

Спомените со прабаба ми и прадедо ми останале врежани во моето срце и ме следат во животот, ме мотивираат да живеам барем еден мал дел од она што го поминувавме со нив, посебно сега кога сум мајка и секако здравјето на моето дете е приоритет. 

Селото и нашата семејна куќа која прадедо ми и прабаба ми сами ја изградиле за своите внуци и правнуци сè уште стои на свое место, но градината немаше кој да ја одржува.

Изминативе години особено после „времето на корона“, нè наведе мене и мајка ми многу често да размислуваме за наша градина.

Почнавме да истражуваме, да се консултираме со веќе искусни градинари, но во меѓувреме учев и практикував совети од фамилијата на мојот сопруг. Во нивниот двор одгледуваат домашни производи во летниот период. 

Оваа година заедно со мојот ментор во животот - мојата мајка го започнавме нашиот креативен проект во викендичката во близина на Скопје и направивме мини градина. 

Најголема радост во целиот овој процес е мојот син, кој секогаш со нетрпеливост кога стигнуваме во викендичката, веднаш трча да провери како е нашата градина, да си набере највкусни пиперки и шери домати, кои се омилени за него. 

По стапките на мојата прабаба, баба и мајка, готвењето е моја омилена креативна активност, во која секогаш вложувам многу љубов.

Свежо набрано и веднаш зготвено во вкусна манџа, салата со домашната ракија на тато, пита со блитва и домашно сирење од пасиштата на сè уште чистите и незагадени пространства во источна Македонија. Незаменливо! 

Продолжува на следната страница...