Совети и техники кои ќе ви помогнат да се смирите среде паничен напад, според психолози
Фокусирајте се на вашето опкружување, контролирајте го дишењето и не плашете се да побарате помош од професионалец – Како да се смирите среде паничен напад, но и што можете да направите за да го избегнете во иднина?
Паничните напади не се опасни по живот, но симптомите што ги предизвикуваат можат да ве натераат да мислите дека умирате, особено ако не сте ги искусиле претходно.
Најчестите симптоми вклучуваат многу изразено чувство на страв, забрзано чукање на срцето, потење, тресење, отежнато дишење, гадење, главоболка, па дури и сомневање во реалноста.
Кога првпат ќе доживеат паничен напад, многу луѓе се плашат дека ќе се повтори, особено на јавно место, како состанок.
За жал, паничните напади стануваат мошне честа појава и ако се соочувате со нив, важно е да знаете како можете да си помогнете.
За Daily Mail, психолозите Иан Стенли, Карен Лин Кесиди и Керолин Рубенстајн споделуваат техники кои ќе ви помогнат да се смирите додека имате паничен напад.
Нивните совети во продолжение:
Метод 4:6
Доктор Иан Стенли, психолог од Универзитетот во Колорадо, советува да се фокусирате на дишењето.
Додека вдишувате, бројте до четири, а потоа за издишувањето бројте до шест. Дишете со овој ритам додека не почувствувате дека се релаксирате.
Психологот вели дека издишувањето треба да биде подолго бидејќи помага во релаксирањето.
„Оваа техника, на некој начин, го тренира телото да забави, а потоа да добие и физиолошки фидбек – дека заканата не е толку опасна како што паничниот напад ве тера да мислите“.
Техника „виножито“
Доктор Керолин Рубенстајн од Флорида советува за време на паничен напад, да пробате да се фокусирате на нешто што ќе ви го одвлече вниманието од паниката.
Техниката се нарекува „виножито“ бидејќи треба да се фокусирате на предмети во вашето опкружување со боите на виножитото.
„Во вашата околина побарајте три црвени, три портокалови, три жолти, зелени и сини предмети. Оваа техника е навистина корисна бидејќи ви го задржува вниманието, а нема да ви одземе многу време.
Техниката ве присилува да си ја проширите перспективата и да излезете од вашето тело на неколку минути, за да можете да се смирите“.
Доктор Керолин истакнува дека сличен ефект ќе добиете и ако си пуштите песна што ве расположува или ако ги ставите дланките во многу студена вода.
Научете да го идентификувате паничниот напад
За некои луѓе, од голема помош може да биде и самото идентификување на паничниот напад.
Ако имате искуство со панични напади, тогаш многу добро знаете како изгледаат, па искористете го тоа во ваша корист.
„На овој начин вие имате контрола, наместо да дозволите симптомите да ве контролираат. Ова е ментален трик, ве тера да размислувате логички и да не им дозволите на емоциите да ве контролираат.
Идентификувањето на паничниот напад е важно за враќањето на контролата, што може да биде од огромна помош кога чувствувате дека нештата се надвор од ваша контрола“, вели доктор Керолин Рубенстајн.
Продолжува на следната страница...
Би можело да ве интересира:
![](https://www.crnobelo.com/media/com_jvrelatives/images/thumbs/com_content_105106_400.jpg)
![](https://www.crnobelo.com/media/com_jvrelatives/images/thumbs/com_content_108630_400.jpg)
![](https://www.crnobelo.com/media/com_jvrelatives/images/thumbs/com_content_108464_400.jpg)
![](https://www.crnobelo.com/media/com_jvrelatives/images/thumbs/com_content_103741_400.jpg)
![](https://www.crnobelo.com/media/com_jvrelatives/images/thumbs/com_content_109177_400.jpg)
![](https://www.crnobelo.com/media/com_jvrelatives/images/thumbs/com_content_108129_400.jpg)