Сладок микс од луксуз и авангарда: Вториот ден од Модниот Викенд во Скопје

Луксуз, јапонска инспирација, геометрија, авангарда... е дел од описот на атмосферата на втората вечер од Модниот Викенд.

Вечерта им беше посветена на Европскиот универзитет, Линеа, Тијана Младеновиќ (Србија), Елези (Париз) и секако неповторливата Ирина Тошева.

Кога зборуваме за материјали, најприсутни беа жоржетот, памукот и свилата. Од боите, вариететот е ограничен на црната, белата, црвената, сивата, со примеси од зелена и морнарско сина.

Освен голиот грб, кулотите и кроп топовите, дизајнерите препорачуваат тесни здолништа, транспарентни блузи и асиметрични комбинезони.

 

Линеа

Оваа модна куќа се фокусира кон задоволување на вкусот на секојдневната жена нудејќи парчиња кои блескаат со бизнис стил во сладок микс со кежуал девојка.

Она што е важно да се напомени е ризичноста со боите. Разни комбинации на розова со црвена, тиркизна со морнарско сина се прелеваа на модната сцена.

Одејќи по стапките на Коко Шанел, Линеа ја претставува жената како способна и моќна, но сепак со насети на феминизам и женствен изглед. Освен ризичната комбинација на бои што се покажа како успешна, преовладуваа костими составени од здолништа, сако и блуза.  

 

Тијана Младеновиќ

Тијана Младеновиќ од Србија се претстави со колекцијата насловена како „Шингами“. Авангардата и футуризмот се главен мотив, а изборот на бои е претежно монохроматски.

Манекенките кои наликуваа на гејши носеа сандали слични на дрвените што се носат во Јапонија со бели чорапи.

Најзастапени се парчиња со асиметрични ракави надополнети од набори во стил на шпанската фламенко танчарка.

 

Елези Париз

Првата помисла кога ќе ја видите ваквата колекција е „луксуз“. Изработена од свила, моделите на Елези Париз беа како невести.

Белата боја беше единствена основа, но боите се гледаа во деталите, поточно во принтот кој беше составен од шарени точки претежно во портокалова, зелена и сина боја.

Покрај 2-3 невестински модели беа презентирани и фустани за посебна пригода.

 

Ирина Тошева

Пастел и богата текстура се првите зборови кои ќе ви паднат на ум кога ќе ја погледнете колекцијата на Ирина Тошева.

Интересни засеци, принт кој потсетува на ацтеки со 3D елементи се дел од новите иновации кои ги замислила Ирина Тошева.

Колекцијата е слатка и нежна, а најкористен материјал е свилата.

Софија Сионова | Црнобело

Фото : Ани и Дими