Како да останете енергични и мотивирани на работа додека мислите ви се на плажа?

Навистина не е важно колку ја сакате и уживате во вашата работа. Секој во одреден период се чувствува летаргично на работното место, а ова е особено изразено за време на летниот период, кога температурите се високи, а бројноста на колегите проретчена. 

Всушност, изгледа како сите да биле или се веќе заминати на одмор, а вие сте единствениот чувар на компанијата.

Уморни сте, денот изгледа неверојатно долг, а екстремните температури си го земаат данокот...

Неколку корисни совети како да останете енергични и мотивирани на работа, додека мислите ви летаат само на море, плажа и коктели:

Започнете го денот со вежбање

Навијте го алармот 30 минути порано, доколку сонцето веќе не успеало да ве разбуди. Посакајте му добро утро на денот со јога, неколку лесни кардио вежби по сопствен избор или џогирање во близината на домот. Ќе се изненадите колку многу повеќе енергија ќе имате во текот на денот.

Држете се подалеку од социјалните мрежи

Ќе ја завршите работата подобро и побрзо, а сите оние фотографии со луѓе по одмори кои ве демотивираат едноставно ќе бидат подалеку од вашите очи. Збогум Фејсбук, Твитер и Инстаграм, барем на кратко.

Јадете здрави и свежи ужинки

Грицки и чоколатца или свежо овошје, салата и зелено смути? Изборот и не е премногу тежок. Умот ќе ви биде побистар, а енергијата на солидно ниво. Не заборавајте да пиете многу вода.

Ставете си растение на работното биро

Едноставно – расположете се и подобрете ја атмосферата на работа со букет свежо цвеќе или некое саксиско растение.

Пуштете си ја омилената музика

Ќе ви ја зголеми креативноста, ќе ви го подобри расположението и со омилената музика денот гарантирано ќе помине побрзо.

Дојдете со велосипед, наместо со автобус или автомобил на работа

Следуваат бројни бенефити како награда од возењето велосипед, а паузата може да ја исполните со уште една кратка прошетка до омилената дестинација за сладолед или свеж сок на чист воздух, во парк или омиленото кафуле.

Ручајте надвор

Без разлика дали си носите јадење од дома или планирате да јадете некаде надвор, ручекот поминете го на сонце или во пријатна сенка, бидејќи промената на општото опкружување секогаш делува позитивно.

Почестете се со десерт после работа

Заслуживте, сепак преживеавте топол летен ден заглавени во канцеларија. Еден нискокалоричен овошен сладолед нема да направи голема калориска разлика, но разликата ќе ја почувствувате во расположението.

Пијте доволно кафе

Кофеинот ќе го подигне нивото на енергијата и ќе се бори заедно со вас против дремката која ве напаѓа. Но, внимавајте на количината, не сакате да бидете хиперактивни, а потоа брзо да се преморите.

Истегнете се

Правете почести паузи и секогаш кога ќе имате можност добро истегнете се. Ќе ја подобрите циркулацијата, ќе ја спречите главоболката и ризикот од вкочанување на вратот од клима уредот во канцеларијата.

Насмејте се со вашите колеги

Мора да има барем една кутра душичка која е на работа заедно со вас, додека остатокот ужива на плажа. Споделете си ги маките и плановите за вашиот одмор со колешката и утешете се дека и вие наскоро ќе уживате, додека другите ќе работат.

(О)Милена | Црнобело