Слабеењето е побрзо, водата врие на пониска температура – како се менува животот на поголема надморска височина?

Научниците забележале дека кај децата родени на поголема надморска височина, како Тибет, пубертетот почнува подоцна во споредба со децата кои живеат на пониски места.

Сте се запрашале ли некогаш какви разлики постојат помеѓу луѓето кои живеат на поголема и помала надморска височина?

На поголема надморска височина воздухот е поредок, а ова има влијание врз целиот организам. Некои од овие влијанија се позитивни, но некои можат и да бидат штетни.

Што се случува со организмот на поголема надморска височина?

На поголема височина можете побрзо да ослабите

Многу истражувања нашле поврзаност помеѓу живеењето на поголеми надморски височини и побрзото слабеење.

Најпрво, на поголема височина организмот веројатно ќе потроши повеќе енергија, односно ќе согори повеќе калории.

Истовремено, истражувањата покажале дека на поголема височина се намалува и апетитот бидејќи се зголемува лачењето на лептин – хормон кој го потиснува чувството на глад.

Апнејата може да биде честа појава

Како што веќе спомнавме, воздухот е поредок на поголема височина, а ова може да предизвика отежнато дишење, особено ако не сте навикнати на таа височина.

Поради ова, луѓето кои веќе страдаат од апнеја во сонот можат да забележат влошени симптоми, а овој проблем може да се јави и кај луѓе кои воопшто го немале претходно.

Луѓето кои живеат на поголема височина имаат поголем капацитет на белите дробови

Поради реткиот воздух, луѓето кои живеат на поголеми височини ќе мораат да вдишат поголемо количество воздух.

Па, луѓето кои се родени на вакви височини имаат за 20% поголем капацитет на белите дробови за разлика од оние кои живеат на помала височина.

Пубертетот настанува подоцна

Некои истражувања покажале дека кај децата кои се родени на поголема надморска височина, како во Тибет, пубертетот почнува подоцна и тие созреваат побавно.

Вежбањето на поголема височина може да ве направи поиздржливи

Многу професионални спортисти тренираат на поголема надморска височина од онаа на којашто им е привикнат организмот.

За време на оние тренинзи тие се заморуваат побрзо, па со текот на времето стануваат поиздржливи.

Одењето на поголема надморска височина може да биде опасно за луѓето со кардиоваскуларни проблеми

Високата надморска височина, особено ако е придружена со активност како пешачење или трчање, создава дополнителен напор на срцето.

Ова, пак, може да предизвика дополнителни проблеми за оние кои веќе имаат проблеми со срцето.

Ова не важи за луѓе кои целиот живот живеат на голема надморска височина бидејќи нивниот организам е навикнат на такви услови.

Истото важи и за луѓето со респираторни проблеми

Повторно поради пореткиот воздух, големата надморска височина може да ги влоши симптомите кај луѓето со респираторни проблеми.

Водата врие на различна температура во зависност од надморската височина

Ние знаеме дека водата почнува да врие на 100 степени Целзиусови. Но, како што се зголемува височината, точката на вриење на водата се намалува.

Поради намалениот атмосферски притисок, водата, но и другите течности испаруваат побрзо, па поради тоа и зовриваат на пониски температури.

Поради ова, на околу 2.200 метри надморска височина, водата почнува да врие на околу 92 степени Целзиусови.

Спирова С. | Црнобело