Необични работи кои може да ги најдете на Амазон

Пред некој ден немав попаметна работа, па додека чепкав по интернет, читајќи необични статии, налетав на веб-страната Амазон.

Да бидам искрен, ретко пребарувам тука и во тој момент се сетив дека еден пријател ми зборуваше какви сè необични стварчиња можеш да најдеш во оваа онлајн продавница.

Мислам дека изгубив саат и нешто, гледајќи работи кои многу ретко можат да ти бидат од корист. И се запрашав, зарем ги купува некој.

Штом се веќе ставени таму, веројатно некој и ги поседува по дома. Во секој случај, постојат луѓе кои наоѓаат радост во поседување на необични предмети, можеби и јас ќе бидам таков еден ден. 

Доволно е што се наканив да напишам текст на оваа тема. Тоа е изгледа првиот чекор. 

Во продолжение следува листа не необични работи кои мене лично ми го привлекоа внимание на Амазон:

Овој продукт беше појдовна точка – раце со прсти за рака со прсти, барем јас така си ја преведов оваа необична, но истовремено и интересна играчка.

Уште почудно ми стана кога видов дека се продаваат 1.500 живи бубамари, кои гарантираат дека инсектите ќе стигнат живи на домашна адреса.

Посакав да си нарачам, ама се предомислив. Сигурно сите 1.500 бубамари нема да го издржат патот до Македонија или самите ќе се погубат од фактот што се тука испратени.

Ова е малку забегано. Daddle Saddle или во превод седло за коњ (татко ти), идеално за деца од 2 до 6 години.

Наместо да купувате сапуни од локални супермаркети, нарачајте си органски сапун за капење со зрнца од кафе во форма на жаба. 

Дами, ако ве мава некоја депресија, замислете дека сапунот е принц и со еден бакнеж ќе го добиете својот партнер на животот.

Во случај ако сакате на вашите деца да им ја разбудите креативноста или едноставно вие сакате да се навратите на некои стари времиња, нарачајте ја оваа необична боенка со животни што прдат. Мислам дека ќе се забавувате до бесвест!

Доста се за денес. Продолжуваме наскоро!

Автор: Х. Е. | Црнобело