4 апокалиптични кризи за кои не сме свесни дека доаѓаат

Апокалипсата е нешто што го замислуваме како крај на светот, кога сè е срушено и претворено во отпад.

Реалната слика за апокалипсата е малку поинаква.

Додека живееме мислејќи дека сè околу нас се одвива во најдобар ред, во многу области од животот не е така.

Ова се неколку кризи кои се толку блиску до нас, а не сме свесни за тоа:

Важните софтверски кодови стануваат прекомплицирани

Со развојот на технологијата, очекуван беше и подемот на сајбер-криминалот. Поради тоа, девелоперите, покрај основната програма, треба да мислат и на тоа како да го заштитат софтверот.

Поради тоа, технологијата која ни е секојдневно достапна, всушност е целодневна работа на одржување, заштита, менување на приоритетите, лоцирање на проблемите и долги редови код кои голем дел од луѓето не можат ни да ги разберат.

Инсектите секојдневно исчезнуваат

Секојдневно слушаме дека популацијата на пчелите се намалува, но тоа се случува и со сите други инсекти (освен можеби со мувите). Дури и биолозите веќе имаат проблеми со систематизацијата на преостанатите видови и предупредуваат на сите можни неприлики кои ги носи исчезнувањето на инсектите.

Но, инсектите се храна на птиците и на некои видови риби. Тоа значи дека и птиците и рибите може да станат ризична група, со оглед на намалената количина на храна. И покрај тоа што ова се случува со за нас незабележителна брзина, ризикот е преголем и опстанокот на целиот жив свет е доведен во прашање.

Сè повеќе луѓе немаат пристап до чиста вода

Околу 2 милијарди луѓе во светот имаат сериозен проблем со достапноста на чиста вода и за технички потреби и за пиење. Резервите на чиста вода се намалуваат и нејзината достапност може да стане проблем дури и на елитите.

Ова се должи и на климатските промени, но и на неконтролираното трошење на водата, на загадувањето, сечењето на шумите, индустрискиот и домашниот отпад.

Постои и недостаток на почва

Не секој отпад може да биде претворен во почва и ѓубриво. Удел во ова имаат и климатските промени, но и неконтролираната (зло)употреба на природните ресурси во масовното производство на храна.

Загадувањето исто така уништува големи количини почва, која веќе не е плодна и нема услови за развој на земјоделството. Со тоа човештвото е доведено во ризик, но и целокупниот жив свет на оваа планета.

Е. Д. | Црнобело