Првут на капата, бактерии на ракавиците: Како правилно да ги одржувате зимските модни додатоци?

Сигурно ги обожавате вашиот топол голем шал, меката капа и ракавиците, но дали помислувате колку всушност, тие се валкани?

Пред сè, на капата остануваат првут, влакненца, маснотии од косата и остатоци од козметички производи. Во шалот дишете, а тоа кондензира врз површината. Исто така, ретко кој внимава каде го остава, а и често паѓа, па лепи нечистотии врз него.

А замислете што се случува со ракавиците? Со нив безгрижно допирате секакви површини, а и можеби и не ги ни вадите ако нешто ве зачеша на лицето. Затоа е потребно од зимските модни додатоци да имате по повеќе парчиња, за да можете да се заштитите од кожни инфекции и непријатен мирис.

Прочитајте како да ги чистите:

Шалови

Ако ги перете во машина за перење, најдобро би било тоа да го правите во специјална цврста мрежа. Со тоа ќе спречите конецот да се закачи за нешто друго и да се истегне.

Ако се работи за волнен шал, перете го настрана од другата облека, на најниска температура и не го сушете во сушарата, туку на воздух или на место каде редовно се проветрува.

Капи

Волнената капа перете ја како и шалот. Ако не е волнена, тогаш перете според упатството на декларацијата. Ако сепак не ви се ризикува, секогаш можете да ја исперете на рака, но внимавајте да ја исушите добро (не користете сушара) пред да продолжите да ја користите.

Ракавици

Нив можете да ги перете во машина, но важно е исто така да не ги ставате во сушара. Волнените можете да ги перете во машина, додека кожените треба да ги пребришете со микрофибер крпа и малку детергент за садови. Исто така, може да користите и специјално средство за чистење на кожа.

Е. Д. | Црнобело